PM:06:25:03/09/2026
960 جار خوێندراوەتەوە
هاوپەیمانیی ئاوەدانکردنەوە و گەشەپێدان دوا زانیارییەکانی لەسەر کۆبوونەوەکانی دەستەی سێقۆڵی (سوودانی و مالیکی و عامری) لەگەڵ گروپە چەکدارەکان ئاشکراکرد، کە ئامانج لێی کۆنتڕۆڵکردنی پرسی کۆکردنەوەی چەکە لە دەستی دەوڵەتدا، دەستەکە پشتگیریی لە رێکارەکانی حکومەت دەکات و ئاماژە بەوەش دەکات، دەکرێت رۆژی ٣٠ی ئەم مانگە وەرچەرخانێکی گرنگ بێت بۆ یەکلاییکردنەوەی تەواوەتی ئەم دۆسیەیە.
ئەمڕۆ پێنجشەممە ٣ـی ئەیلولی ٢٠٢٦، هاوپەیمانیی ئاوەدانکردنەوە و گەشەپێدان دوا پێشهاتەکانی تایبەت بە کۆبوونەوەکانی ئەو دەستە سێقۆڵییەی راگەیاند، کە هەفتەی رابردوو لەلایەن چوارچێوەی هەماهەنگییەوە و بە ئەندامێتیی محەمەد شیاع سودانی و نوری مالیکی و هادی عامری پێکهێنرا، ئامانجی سەرەکیی دەستەکە کۆنتڕۆڵکردنی دەرئەنجامەکانی پرسی کۆکردنەوەی چەک و رێگریکردن لە گرژییەکان لە راگەیاندنەکانەوە.
خالد
وەلید ئەندامی مەکتەبی سیاسیی هاوپەیمانییەکە رایگەیاند، دەستەی پشتگیریی لە رێکارەکانی
حکومەت دەکات بۆ کۆکردنەوەی چەکی گروپەکان، بۆ ئەو مەبەستەش گفتوگۆکان لەگەڵ گروپە چەکدارەکان بەردەوامن و ئاماژە
ئەرێنییەکان دەریانخستووە کە توانای کۆنتڕۆڵکردنی گرژییەکان هەیە.
لە
لایەکی دیکەوە، هەریەک لە مالیکی و عامری هاوڕان لەسەر بەکارهێنانی چەمکی (رێکخستن
و کۆنتڕۆڵکردن)ی چەکی گرووپەکان، لەبەر ئەوەی چەمکی (داماڵینی چەک) رەنگە
کاریگەریی دەروونی لەسەر لایەنی بەرامبەر دابنێت.
پرسی کۆکردنەوەی
چەک لە دەسەت دەوڵەتدا، تا ئێستا رەزامەندیی هەموو گرووپەکانی بەدەستنەهێناوە،
بزووتنەوەی نوجەبا و کەتیبەکانی حیزبوڵڵا و کەتیبەکانی سەیدولشوهەدا و چەند گروپێکی
دیکە رەتیانکردووەتەوە لە ٣٠ی ئەیلولدا دەستبەرداری توانای سەربازیی خۆیان بن و
پاشەکشەی هێزە بیانییەکان بە مەرجی سەرەکی دەزانن، لە بەرامبەریشدا، هاوپەیمانیی
ئیدارەی دەوڵەت هۆشداریداوە کە دوای ئەو رێکەوتە، مامەڵە لەگەڵ هەر چالاکییەکی
چەکداریی لە دەرەوەی دەوڵەتدا بەپێی یاسای بەرەنگاربوونەوەی تیرۆر دەکرێت.
