ئەحمەد عەلی، نوێنەری دەرچووانی زانکۆ و پەیمانگاکان ڕایگەیاند، ئێمە وەکو سێ یەکەمەکانی زانکۆ و پەیمانگاکانی هەرێمی کوردستان دوای ئەوەی ٤٧ جار خۆپیشاندانی ئاشتیی و هێمانەمان ئەنجامداوە، ماوەی نۆ ساڵە چاوەڕوانی دامەزراندنین، کە بەفەرمانی سەرۆکی حکومەت بایۆمەتریمان ئەنجام داوە، تەنیا کۆتا واژۆی ماوە بۆ دامەزراندنمان.

​ئاماژەی بەوەشکرد، ئێمە نۆ ساڵە مافمان دەخورێت و لە چاوەڕوانیداین، هەر ساڵێک بە بیانوویەک ڕامان دەگرن، دەمانەوێت وەکو دەستەی نوێنەرانی سەرجەم سێ یەکەمەکانی زانکۆ و پەیمانگاکان بۆ هەموو لایەکی ڕوون بکەینەوە، دوایی کۆبوونەوە و قسەکردنمان لەگەڵ سەرۆکی ئەنجوومەنی ڕاژە و بەڕێوەبەری گشتی بودجەی هەرێمی کوردستان و لایەنە پەیوەندیدارەکان بەگشتیی و بەشێک لە فراکسیۆنەکانی پەرلەمانى عێراق هیچ لایەنێک نییە بڵێت ئەمە مافی خۆتان نییە.

باسی لەوەشکرد، سەرباری ئەوەی بەپێی یاسای ژمارە (١٠) برگەی (٢٥)ـی ساڵی ٢٠٠٨ـی هەرێمی کوردستان و ماددەی ٦٧ـی ساڵی ٢٠١٧ـی پەرلەمانی عێراق، پێویستە دوای دەرچوونمان ڕاستەوخۆ هاوشێوەی یەکەمەکانی عێراق دابمەزرێن، نەک ماوەی نۆ ساڵ چاوەڕوان بین و دەستی دەستیمان پێبکەن.

وتیشی، داوا لە سەرۆکی حکومەت و جێگرەکەی دەکەین، کە خۆیان پێداگری بکەن لەسەر دامەزراندنمان و داوا لەسەرجەم فراکسیۆنە کوردیەکان لە بەغداد بکەن، بە هیچ جۆرێک سازش نەکەن لەسەر دامەزراندنمان، چونکە جگه لەوەی کە بۆ زانکۆ و پەیمانگاکان پێویستین، نۆ ساڵەیشە چاوەڕوانین.

جەختی کردەوە، دەمانەوێت ئەوە بۆ هەموو لایەک ڕوون بکەینەوە دانەمەزراندنمان جگه لەوەی کەمتەرخەمی حکومەتی هەرێمە، لە ئێستادا لەسەرشانی وەزارەتی شاندی دارایی هەرێم و سەرجەم ئەندامانی کوردی پەرلەمان عێراقە، کە بەرپرسن لە بژێوی و ژیانی ١٦ هەزار یەکەم لە سەرانسەری هەرێم.

ئەوەشی خستەڕوو، نابێت بەهیچ شێوەیەک سازش لەسەر مافی یاسای ئێمە بکەن و کەمتەرخەمبن، بۆیە تکا دەکەین بە هەمووتانەوە کۆتایی بەم چاوەڕوانییە تراژیدییە بهێنن و پێداگری بکەن لەسەر مافی کورد و ئێمەی یەکەمەکان و ئایندەی زانستی زانکۆ و پەیمانگاکانی هەرێمی کوردستان.

​