خۆپیشاندانەکانی١٧ـی شوباتکە بە شەهیدبوونى١٠ کەس و برینداربوونى نزیکەی ٥٠٠ کەسی دیکە کۆتاییان هات، لە مێژووی هەرێمی کوردستاندا، بە درێژترین و بەردەوامترین خۆپیشاندانى سەرجەم چین و توێژە جیاوازەکانى خەڵک دادەنرێت، کە بۆ ماوەی٦٢ رۆژ لەسەریەک بەردەوام بوو، لە دوای راپەڕینیشەوە، بە خاڵێکی وەرچەرخان لە مێژووی هەرێمدا دادەنرێت کە بۆیەکەمجار هاوڵاتیان بە ئاشکرا و بەبێ ترس دژی پارتی و یەکێتی وەستانەوە و داوای گۆڕینی سیستمی حوکمڕانیان کرد.

ئێستا و ١٥ ساڵ دوای خۆپیشاندانەکان گوزەرانی هاوڵاتیان بەرەو خراپتر رۆشتووە و خزمەتگوزارییەکانی وەکو کارەبا و پڕۆژە خزمەتگوزارییەکان و ئاو، لەسایەی دەسەڵاتی پارتی و یەکێتییەوە هاوڵاتیان بێبەشن لێی و جگە لەوانەش دەستی بردووە بۆ قوتی خەڵک و زیاتر لە ٦٠ مووچەی مووچەخۆران بە لێبڕینەوە دابەشکراوە یان هەر دابەشنەکراوە.

هاوکات جووت حزبەکە رێز لە داوا و خەباتی مەدەنی هاوڵاتیان و مووچەخۆرانی کوردستان ناگرن و وەڵامی هیچ خۆپیشاندن و ناڕەزایەتییەکیش نادەنەوە و دامەزراندنیان نەهێشتووە و جوڵەیان لە بازار بڕیوە و باجیان زیاد کردووە. واتە لەماوەى ئەم ١٥ ساڵدا، دەسەڵاتدارانى هەرێم نەک هەر بیریان لە چاکسازی نەکردووەتەوە بەڵکو بەردەوامن لە غرورى سیاسیی و ئەوەى لە خەیاڵیاندا نەبێت دۆخى خراپیی خەڵکە.