PM:06:19:24/12/2025
10760 جار خوێندراوەتەوە
وەزارەتی کار و کاروباری کۆمەڵایەتیی عێراق دەڵێت، قەرز دەدەنە توێژێکی دیاریکراو بۆ کڕینی ئۆتۆمبێلی گواستنەوەی سەرنشینان و وردەکاری و مەرجەکانی پێدانی قەرزەکەیان بڵاوکردەوە و ئەمەش لە چوارچێوەی دەستپێشخەرییەکی ئەنجوومەنی وەزیراندایە بۆ رەخساندنی هەلی کار.
ئەمڕۆ چوارشەممە ٢٤ـی کانونی یەکەمی ٢٠٢٥، حەسەن خەوام، وتەبێژی وەزارەتی کار و کاروباری کۆمەڵایەتیی عێراق وتی، ئەم قەرزە تەنها ئەو کەسانە دەگرێتەوە کە بێکارن و پێشتر ناوەکانیان لە بنکەی زانیارییەکانی فەرمانگەی کار و ڕاهێنانی پیشەیی تۆمار کردووە و مەرجی سەرەکی بۆ وەرگرتنی قەرزەکە ئەوەیە داواکار دەبێت خاوەنی مۆڵەتی شۆفێریی گشتی بێت.
وتیشی، جێبەجێکردنی
ئەم بڕیارە وەستاوەتە سەر دابینکردنی تەرخانکراوی دارایی و پێشبینی دەکرێت لە
چوارچێوەی بودجەی ساڵی ٢٠٢٦ـدا جێگە بکرێتەوە، پارەکە بەشێوەی کاش نادرێتە دەستی
سوودمەند، بەڵکو لەڕێگەی کۆمپانیا رێپێدراوەکانەوە ئۆتۆمبێلێکی جۆری ١١ یان ١٢
سەرنشینی بۆ دەکڕدرێت و راستەوخۆ بەناوی دەکرێت.
ئاماژەی
بەوەشکرد، ئەم پرۆسەیە بە مەرجێکە کە ئەو
کەسەی سوودمەند بووە بڕی قەرزەکە بەبێ زیادە و سوود (فائیدە) بۆ حکومەت بگێڕێتەوە،
و لە لایەکی تریشەوە کۆمپانیاکان رۆڵی نێوەندگیر دەگێڕن لەنێوان شۆفێرەکان و
دامەزراوە حکومییەکان، کۆلێژ و قوتابخانە ئەهلییەکان بۆ دابینکردنی گرێبەستی
گواستنەوەی فەرمانبەران و خوێندکاران.
هەر بەگوێرەی
پلانی وەزارەتەکە، ئەم هەنگاوە دوو ئامانجی هەیە، هەلیکاری راستەقینە بۆ بێکاران
دەڕەخسێنێت، هەروەها دەبێتە هۆی کەمکردنەوەی جەنجاڵیی هاتووچۆ لە شەقامەکانی
عێراقدا.
