دوای سەدەیەک لەناوچوونیان گورگەکان لە باکور و باکوری رۆژئاوای ئەڵمانیا دەرکەوتوونەتەوە و شوانکارانی ئەو ناوچانە بە شێوەیەکی زیاتر رووبەڕوویان دەبنەوە و ژمارەی گورگ لە ماوەی ١٠ ساڵی رابردوو لەو وڵاتە شەش هێندە زیادی کردووە.
رۆژنامەی واشنتۆن پۆستی ئەمریکی بڵاویکردەوە، شوانکارانی ناوچەکانی باکور و باکوری رۆژئاوای ئەڵمانیا کە ئاژەڵەکانیان لە دارستانەکانی ناوچەکە دەلەوەڕێنن بەراورد بە ماوەی رابردوو بە شێوەیەکی بەرچاو بەرەنگاری گورگ دەبنەوە.
ماوەی سەدەیەکە گورگ لە ئەڵمانیا لەناوچووە، بەڵام لە ئێستادا دووبارە
دەرکەوتوونەتەوە و ئەمەش بە چیرۆکی سەرکەوتنێکی بایلۆجی ئەو جۆرە گیاندارە
ناودەبرێت.
بەراورد بە ١٠ ساڵی رابردوو ژمارەی گورگ لە ناوچاکانی باکور و باکوری
رۆژئاوای ئەڵمانیا شەش هێندە بووە و جگە لە ئەڵمانیاش ئەو جۆرە گیاندارە لە
بەلجیکا و هۆڵەندا بڵابوونەتەوە و بووە بە یەکێک لە کێشەکانی یەکێتی ئەوروپا.
بەپێی لێکۆلێنەوە زانستییەکان کۆتا کۆمەڵەی گورگ لە ئەڵمانیا لە ساڵی ١٨٥٠
لەناوچوون و هۆکارەکەشی راوچییەکانی ئەو وڵاتەبوون کە وەک پارێزگارییەک لە ئاژەڵەکانیان
و بازرگانیکردن بە پێستەکانیانەوە راویان دەکردن.
لە ئەڵمانیای رۆژهەڵات راوکردنی گورگ کارێکی یاسایی بوو و رۆژانە لە سنووری
نێوان پۆڵەندا و ئەڵمانیا چەندین گورگ لە رێگەی چەکەوە راودەکران، بەڵام دوای
یەکخستنەوەی ئەڵمانیا یاسای پاراستنی گورگەکان لە هەموو وڵاتەکە جێبەجێکرا.