یەکێک لە خوێندارە یەکەمەکان کە ناوی "محەمەد عەلی" یە و دانیشتووی شاری سلێمانییە، توانیویەتی کۆنمرەی ٧٠٠ بەدەست بهێنێت کە خوێندکاری خوێندنگەی ئامادەیی سەلاحەدینی ئەیوبییە و لەسەرجەم وانەکاندا ١٠٠ ی بەدەستهێناوە.

محەمەد عەلی بە ئێن ئاڕ تی راگەیاند، "زیاتر لە ساڵێکە هەوڵی بۆدەدەم و پێشتریش خۆم ئامادەکردبوو چاوەڕوانی ئەوەم دەکرد بۆ ئەمساڵی خوێندن بتوانم لەنێو یەکەمەکانی هەرێمدا خۆم ببینمەوە".

ئاماژەی بەوەشدا، لە ماوەی رابردوودا سەرجەم قۆناغەکانی خوێندنی بەسەرکەوتووی بڕیووە و لە پۆلی نۆیەمی بنەڕەتیشدا یەکەمی سەرئاستی هەرێمی بەدەست هێناوە.

وتیشی، "رۆژانە بەگوێرەی کاتی دیاریکراو هەوڵمدەدا و خێزانەکەم هاوکار و پاڵپشتێکی باشم بوون هەتا بتوانم ئەم نمرەیە بەدەست بهێنم".

ئەوەشی خستەڕوو، ئەو خاوەنی مەدالیای برۆنزی نێودەوڵەتییە بۆ تاقیکردنەوەی بیرکاری و ساڵی پار توانیویەتی لەڕێگەی ئۆنلاینەوە بەشداربێ و لە نێو ٦٠٠ خوێنداکاردا پلەی یەکەم بەدەست بهێنێت و یەکەمین کەسیشە لەسەر ئاستی عێراقدا توانیبێتی ئەو مەدالیایە بەدەست بهێنێت.

محەمەد عەلی ئاماژەی بەوەشدا، وانەی خوازیاری ئەو وانەی بیرکارییە چونکە کەمترین لەبەرکردنی تێدایە و زیاتر پەیوەستە بەزیرەکی و لێهاتوییەکانی خوێندکار خۆیەوە. وتیشی،هەرچەندە بابەتەکە قورسە بەڵام بابەتێکی زۆر چێژبەخشە.

لە رێنماییەکانیدا دا بۆ ئەوخوێندکارانەی کە هێشتا پێیان نەخستۆتە قۆناغی ١٢وە وتی، پێویستە رۆژانە و بەپێی کات کۆشش بکەن و کاتی نان خواردن وخەوتنیان رێکبخەن. هەروەها زیاتر پشت بە تێگەشتن ببەستن و خۆبەدور بگرن لە لەبەرکردن بەبێ تێگەشتن.

باوکی محەمەد کە پزیشکە بە ئێن ئاڕ تی راگەیاند، "خوێندکار نابێ مۆبایل بەکاربهێنێت، ئێمە تەنها هانی محەمەدمانداوە کە بخوێنێت و کۆشش بکات، لەگەڵ ئەوەی جێگای تایبەت بەخۆی نەبووە بۆ کۆشش کردن".

گۆران عەبدوڵا - سلێمانی