زۆرانبازی ئەمریكی هاڵک هۆگن لە ٢٤ی تەمموز لە تەمەنی ٧١ ساڵیدا بە شێوەیەکی کتوپڕ کۆچی دوایی کرد و خێزان و هەوادارانی لە سەرانسەری جیهاندا تووشی شۆک کرد، وەردەکاری نوێی لەسەر مردنەکەی دەرکەوتووە.

پۆلیسی شاری كلیرواتەر لە ویلایەتی فلۆریدا رایگەیاند کە بەردەوامن لە لێکۆڵینەوە و بەدواداچون، دووبارە پێداچوونەوە بە تۆمارە پزیشکییەکان دەکەن و پەیوەندی بە شایەتحاڵەكان دەکەنەوە ، ئەمەش دوای ئەوە دێت کە مشتومڕێکی زۆر دروستبووە لەسەر ئاڵۆزییە پزیشکییەکان کە بوونەتە هۆی مردنی و شێوازی مامەڵەکردن لەگەڵ تەرمەکەیدا، بەشێک لە خەڵکی باس لەوە دەکەن کە سروشتی مردنەكە پێویستی بە بەدواداچون و لێكۆڵینەوەی ورد هەیە.

جێگەی باسە بەپێی ئەو بەڵگەنامانەی کە لەلایەن "Us Weekly" بڵاوکراونەتەوە، هاڵک هۆگن بەهۆی جەڵتەی دڵەوە کۆچی دوایی کردووە، دواتر بڕیاری لێكۆڵینەوەدرا بێ ئەوەی هۆكاری مردنەکەی ئاشكرابكەن، بەڵام کاتێکی فەرمی دیاری نەکرا بۆ بڵاوكردنەوەی ئەنجامی لێكۆڵینەوەكان ئەمەش گومانی لەلای بەشێکی خەڵکی دروست کرد.