PM:03:36:27/04/2024
2072 جار خوێندراوەتەوە
+
-
پەرلەمانتارەکێ
پەرلەمانێ عێراقێ بۆ ئێن ئاڕ تی ڕاگەهاند، دناڤبەرا عێراق و هەرێما کوردستانێ
رێکەفتن دەربارەی ب بەنکی کرنا مووچەیێ مووچەخۆرێن هەرێمێ هاتیە کرن و د دەمەکێ
نێزیک دا دێ چیتە بیاڤێ جێبەجێکرنێ. دبێژیت ژی، "پشت بەستن ب بەنکێن عێراقێ
بۆ جێبەجێکرنا بڕیارا ب بەنکی کرنا مووچەی دەمەکێ کێمتر پێدڤیە و گرنگترە بۆ
مووچەخۆران".
ئەڤرۆ
شەمبیێ، بڕیار رەشید پەرلەمانتارێ پەرلەمانێ عێراقێ دەربارەی ب بەنکی کرنا مووچەیێ
مووچەخۆرێن هەرێمێ بۆ ئێن ئاڕ تی ڕاگەهاند، ب بەنکی کرنا مووچەی دەمەکێ کێم مایە و
بۆ وێ مەرەمێ ژی رێکەفتنەکا دەستپێکی دناڤبەرا بەغدا و هەرێمێ بۆ ڤەکرنا لقێن
بەنکێن رەشید و رافیدەین ل دەڤەرێن جودایێن هەرێمێ هاتیە ئەنجامدان.
ئاماژە ب وێ
یەکێ ژی کر، پێداگیری لسەر ڤەکرنا بەنکێن عێراقی دهێتە کرن، ژبەرکو باوەری ب بەنکێن
عێراقێ زێدەترە و کارتێن وان ل هەمی ناڤەندێن ئابوریێن جیهانێ کار پێ دهێتە کرن.
گۆت ژی، "ئەگەر ئەو بڕیار بچیتە بیاڤێ جێبەجێکرنێ بەنکێن عێراقێ دشێن سوبەهی
دەست ب پرۆسەیا ب بەنکی کرنا مووچەی بکەن ژبەرکو لیستا مووچەیێ مووچەخۆران لدەف
هەیە".
بەحسا وێ
یەکێ ژی کر، ب مەرەما ڤەژاندنا ژێرخانا ئابوریا هەرێمێ، پێدڤیە پێنگاڤێن جدی بهێنە
هاڤێتن بۆ جێبەجێکرنا رێکارێن ب بەنکی کرن و پێگیر بوون ب سیستەمێ بەنکی د کڤانا رێنمایێن
بەنکا ناڤەندیا عێراقێ دا.