کەشناسی هەرێم رایگەیاند، بارانبارین لە ناوچە جیاوازەکانی هەرێم دەست پێدەکات و لە دوای نیوەڕۆدا لە پارێزگای هەولێر و دهۆک تاوەباران دەبارێت و هەورەتریشقەشی لەگەڵدا دەبێت، دواتر لە کاتەکانی شەودا کەشەکە سەقامگیر دەبێتەوە.

کەشناسی هەرێم پێشبینییەکانی کەشوهەوای بۆ ٤٨ کاتژمێری داهاتوو راگەیاند و ئاماژەی بەوە کرد، ئەمڕۆ یەکشەممە، ئاسمان نیمچە هەور دەبێت پاشان دەگۆڕێت بۆ هەوری تەواو، بارانبارین لە پارێزگای سلێمانی دەست پێدەکات و دواتر بەشێوەیەکی گشتی نمەبارانی پچڕ پچڕ لەکات و شوێنی جیاواز دەبارێت.

باسی لەوەش کرد، لە دوای نیوەرۆدا لە پارێزگای هەولێر و دهۆک تاوەباران و هەورە تریشقە دەبێت وە لەکاتەکانی شەودا باران بارین نامێنێت و کەشەکە سەقامگیر دەبێت، پلەکانی گەرماش نزیکەی ٣ بۆ ٤ پلە بەراورد بە دوێنێ دادەبەزن.

سەبارەت بە کەشی سبەی دووشەممە ئەوەی خستووەتە روو، ئاسمان لە نێوان پەڵە هەور و نیمچە هەور دەبێت پاشان لە کاتەکانی دوای نیوەرۆ لە ناوچە شاخاوییە سنورییەکانی رۆژهەڵاتی هەرێم نمەباران و تاوەباران دەبێت، دواتر لە کاتەکانی شەودا کەشەکە سەقامگیر دەبێت. پلەکانی گەرماش ٢ بۆ ٣ پلە بەراورد بە تۆمارکراوەکانی ئەمڕۆ بەرز دەبنەوە.

بەرزترین پلەکانی گەرمای پێشبینیکراو بە پلەی سیلیزی:

هەولێر : ٢٧

سلێمانی : ٢٧

دهۆک : ٢٦

زاخۆ : ٢٦

هەڵەبجە : ٢٧

کەرکوک : ٢٩

سۆران : ٢٤

حاجی ئۆمەران : ١٦

گەرمیان : ٣٢

S.A