ھاوپەیمانی نێودەوڵەتی دژی داعش رایگەیاند، ھێزە شەڕکەرەکانیان بە یەکجاری لە عێراق کشاونەتەوە. دەشڵێت، "ئەوانەی لە عێراق ماون بۆ پێشکەشکردنی راوێژ و مەشقپێکردنە".
ئەمڕۆ دووشەممە، ھاوپەیمانی نێودەوڵەتی دژی داعش لە عێراق و سوریا راگەیەنراوێکی بڵاوکردەوە و تیایدا ھاتووە، ھێزە شەڕکەرەکانیان بە یەکجاری لە عێراق کشاونەتەوە.
ئاماژەی بەوشداوە، کشانەوەیان لە عێراق لە دوای دانانی خشتەیەکی دیاریکراو بووە لە ئەنجامی گفتوگۆ ستراتیژییەکانی نێوان عێراق و ئەمریکادا.
باسیان لەوەشکردووە، کشانەوە بۆیە خێراتر کراوە، چونکە ھێزەکانی عێراق و پێشمەرگە توانای شەڕکردنیان باشە و دەتوانن رووبەڕووی داعش ببنەوە.
ئەمە لەکاتێکدایە، لە گفتوگۆی ستراتیژی نێوان عێراق و ئەمریکا رێککەوتن لەسەر کشانەوەی ھێزە شەڕکەرەکانی ئەو وڵاتە و ھێزەکانی ھاوپەیمانی نێودەوڵەتی. لەماوەی رابردووشدا جۆ بایدن سەرۆکی ئەمریکا رایگەیاند، تا کۆتایی مانگی کانونی یەکەمی ئەم ساڵ ھیچ ھێزێکی شەڕکەری وڵاتەکەی لە عێراقدا نامێنێتەوە.