PM:05:10:11/09/2026
868 جار خوێندراوەتەوە
ئەحمەد سەحاف، هەڵسوڕێنەری کارەکانی باڵیۆزخانەی عێراق لە لیبیا ئاشکرای کرد، تاوەکو ئێستا ٣٨٨ کۆچبەری عێراقی گەڕێنراونەتەوە و هەماهەنگیی ئاستبەرز لەگەڵ لایەنە ئەمنییەکانی لیبیا بەردەوامە بۆ رزگارکردنی کۆچبەرانی دیار و نادیار و ئامادەکردنیان بۆ گەڕانەوەی ئارەزوومەندانە.
ئەمڕۆ هەینی ١١ـی ئەیلولی ٢٠٢٦، ئەحمەد سەحاف هەڵسوڕێنەری کارەکانی باڵیۆزخانەی عێراق لە لیبیا بڵاویکردەوە، بە هەماهەنگی لەگەڵ حکومەتی بەغدا و هەرێم، توانراوە ٣٨٨ کۆچبەری عێراقی بگەڕێنرێنەوە، لە ئێستاشدا کار دەکرێت بۆ دۆزینەوە و پاراستنی ژمارەیەک کۆچبەری تر کە لە ناوچەی کشتوکاڵیی (تاجوراء) لە رۆژهەڵاتی تەرابلوس لەلایەن تۆڕەکانی قاچاخچییەتییەوە دەستبەسەر کراون.
روونیشی
کردەوە، باڵیۆزخانەکەیان کارەکانی چڕ کردووەتەوە بۆ دەستەبەرکردنی گەڕانەوەیەکی
ئارەزوومەندانە و ئارام بۆ سەرجەم ئەو عێراقییانەی لە لیبیان، لەو چوارچێوەیەدا
زانیاری دەست کەوتووە لەسەر بوونی ژمارەیەک کۆچبەری نایاسایی لە ناوچەی (تاجوراء)
لە رۆژهەڵاتی تەرابلوس، کە ناوچەیەکی کشتوکاڵیی بەربڵاوە و دەڕوانێت بەسەر دەریادا
و تۆڕەکانی قاچاخچییەتی و بازرگانیکردن بە مرۆڤەوە سوود لەو ژینگەیە وەردەگرن بۆ خەڵەتاندن
و دەستبەسەرکردنیان.
وتیشی،
بە هەوڵی بەردەوام و لەناو بارودۆخێکی ئاڵۆزدا تاوەکو ئێستا ٣٨٨ کۆچبەری عێراقیمان
گەڕاندووەتەوە، پڕۆسەکەش بە بەردەوامی لەلایەن وەزارەتی دەرەوە لە بەغدا و حکومەتی
هەرێمی کوردستان لە رێگەی وەزارەتەکانی ناوخۆ و فەرمانگەی پەیوەندییەکانی دەرەوە
پشتیوانی دەکرێت بۆ دابینکردنی بلیت و ئامادەکردنی رێکارەکانی پێشوازیکردن لە فڕۆکەخانەی
نێودەوڵەتیی هەولێر.
