وەزارەتی پێشمەرگەی حکومەتی ماوەبەسەرچووی هەرێمی کوردستان بە فەرمی کۆتاییهاتنی پرۆسەی یەکخستنەوە و رێکخستنەوەی تەواوەتیی هێزەکانی لە ژێر چەتری وەزارەتەکەدا راگەیاند و دەڵێت، هەرێم دەبێتە خاوەنی سوپایەکی سەردەمیانە و یەکگرتوو.
ئەمڕۆ پێنجشەممە ١٠ـی ئەیلولی ٢٠٢٦، وەزارەتی پێشمەرگە کۆتاییهاتنی پرۆسەی یەکخستنەوەی هێزەکانی پێشمەرگەی لەژێر چەتری وەزارەتەکەی راگەیاند، دەشڵێت، تەواوی هێزەکان لەسەر ئاستی یەک فەرماندەیی لە شێوەی (لیوا و فیرقە و فەرماندەیی دەڤەر) رێکخراونەتەوە و بە هەماهەنگی لەگەڵ فەرماندەیی هێزەکانی ٧٠ و ٨٠ سەرجەم بەربەستەکان تێپەڕێنراون.
شۆڕش
ئیسماعیل وەزیری پێشمەرگە ئاماژەی بەوە کرد، دوای چەندین ساڵ لە تێکۆشان و هەوڵی
بەردەوام، بە هاوکاری و هەماهەنگیی راستەوخۆی فەرماندەیی هێزەکانی ٧٠ و ٨٠، سەرجەم
بەربەست و گرفتە کەڵەکەبووەکان تێپەڕێنراون، وتیشی، هێزەکان لە چوارچێوەی
پرۆسەیەکی ورد و پلان بۆداڕێژراوی سەربازیدا رێکخراونەتەوە.
وتیشی،
لە چوارچێوەی ئەم چاکسازییە ریشەییەدا، تەواوی هێزەکان لەسەر ئاستی یەک فەرماندەیی
و کۆنترۆڵ، لە شێوەی (لیوا و فیرقە و فەرماندەیی دەڤەر) رێکخراونەتەوە و هەردوو
دەڤەری فەرماندەیی سەربازیش بە فەرمی دەستبەکاردەبن.
وەزیری
پێشمەرگە ستایشی پاڵپشتیی بەردەوامی سەرۆکایەتیی هەرێمی کوردستان و سەرۆکایەتیی
ئەنجومەنی وەزیران و هێزەکانی هاوپەیمانیی نێودەوڵەتیی بە سەرکردایەتیی ئەمریکای
کرد، لە سەرخستنی ئەم پرۆسە نیشتمانییەدا، هاوکات داوای کرد لە قۆناغی داهاتووشدا
بە شێوازێکی جیاوازتر بەردەوام بن لە پشتگیریکردنی هێزی پێشمەرگەی یەکگرتووی
کوردستان.