بە گوێرەی نوسینگەی سودانی، تەوەرێکی دیکەی کۆبوونەوەکە تایبەت بوو بە دیاریکردنی نرخی سووتەمەنی بۆ پڕۆژە ناوخۆییەکان لە هەردوو کەرتی گشتی و تایبەت، حکومەتی عێراق هەوڵ دەدات چارەسەرێک بدۆزێتەوە کە کارکردنی پڕۆژەکان بەردەوام بێت و بەهۆی بەرزبوونەوەی نرخە جیهانییەکانەوە تووشی گرفت نەبن، ئەمەش وەک هەنگاوێک بۆ پاراستنی سەقامگیریی ئابووریی ناوخۆ.

هاوکات حەیان عەبدولغەنی، وەزیری نەوتی عێراق لە کۆبوونەوەکەدا جەختی لەوە کردەوە کە کۆگایەکی زۆر و پێویست لە بەرهەمە جۆراوجۆرەکانی سووتەمەنی لەبەردەستدایە بۆ پاراستنی سەقامگیریی وزە.

ئاماژەی بەوەش کرد، پاڵاوگەکان بە تەواوی توانای خۆیان و بەشێوەیەکی سەقامگیر کار دەکەن بۆ ئەوەی پێداویستییەکانی ناوخۆی عێراق بەتەواوی پڕبکەنەوە.

لە کۆتایی کۆبوونەوەکەدا، سەرجەم لایەنە پەیوەندیدارەکان راسپێردران کە بڕیاری گونجاو بدەن بۆ بەردەوامیی کاری شانەی قەیرانەکان تایبەت بە سووتەمەنی، ئامانج لەم هەنگاوە ئامادەکارییە بۆ چارەسەرکردنی دەستبەجێی هەر گرفتێک کە لە ئەنجامی رووداوە سەربازی و ئەمنییەکانی ناوچەکەدا بێتە پێشەوە، تاوەکو کاریگەری لەسەر دابینکردنی وزە دروست نەبێت.