AM:11:53:23/03/2026
4528 جار خوێندراوەتەوە
بەڕێوەبەرایەتیی گشتیی بەنداو و کۆگاکانی ئاوی هەرێم رایگەیاند، لە ٢٤ کاتژمێردا ئاستی ئاو لە بەنداوی دووکان ٨٣ سانتیمەتر و بەنداوی دەربەندیخان ٣٠ سانتیمەتر زیادیان کردووە.
ئەمڕۆ دووشەممە ٢٣ـی ئازاری ٢٠٢٦، بەڕێوەبەرایەتیی گشتیی بەنداو و کۆگاکانی ئاوی سەربە وەزارەتی کشتوکاڵی هەرێم لە راگەیەندراوێکدا ئاماری کۆگاکردن و زیادبوونی ئاستی ئاوی بەنداوەکانی بڵاوکردەوە و تیایدا هاتووە، تەنیا لە ٢٤ کاتژمێرا، بڕی ٢٤٢ ملیۆن مەتر سێجا ئاو لە هەردوو بەنداوی دوکان و دەربەندیخان کۆکراوەتەوە. بەمەش ئاستی ئاوی بەنداوی دوکان ٨٣ سم و بەنداوی دەربەندیخان ٣٠ سم بەرزبووەتەوە.
ئاماژەی بەوەشکرد، بەنداوی دهۆک ٢.٥ ملیۆن مەتر سێجا ئاوی تێڕژاوە و
ئاستەکەی یەک مەتر بەرزبووەتەوە. هەروەها بەنداوی گۆمەسپان نیو ملیۆن مەتر سێجا
ئاوی تێچووە. سەبارەت بە بەنداوە بچوک و ناوەندەکانیش، زۆربەیان پڕبوون و دەستیان
بە سەرڕێژبوون کردووە.
وەزارەتی کشتوکاڵ ئاگاداری هاووڵاتییان دەکاتەوە، ئەمڕۆ بڕی
بەردانەوەی ئاو لە بەنداوی دەربەندیخان زیاد دەکرێت. بۆیە هۆشداری دەدەن بە
هاوڵاتییان و گەشتیاران لە رووباری سیروان و کەناراوەکانی خوارووی بەنداوەکان
دووربکەونەوە و پارێزگاری لە گیانی خۆیان بکەن.
