لە ساڵی ١٩٧٤، فڕۆکە جەنگییەکانی رژێمی بەعس قەڵادزێیان بۆردومانکرد و ١٣٧ هاوڵاتی بێتاوان شەهیدبوون و زیاتر لە ١٥٤ کەس كە‌ ژمارەیەكی زۆریان خوێندکاری زانکۆ بوون و لە بەشەناوخۆییەکان مابوونەوە، برینداربوون.

چەندین ساڵی دواتر، سەرلەبەیانی ٢٤ی نیسانی ١٩٨٢، كاتێک كە خەڵكی شارەكە بە سەرپەرشتی خوێندكاران لە گۆڕستانی شەهیدەکانەوە گەڕانەوە بۆ قەڵادزێ، لەلایەن هێزە ئەمنییەكانی رژێمی بەعسەوەوە رێیان لێگیرا و دواتر تەقەیان لێکرا.
لەو کاتەدا دوو مامۆستای ژن كە دەیانویست لە ئاوی رووبارەكە بپەڕنەوە، بەهۆی زۆری ئاوەكە لە بەهاردا، لە ئاوەكەدا خنکان، هەروەها دوو خوێندكاریش بە گوللە برینداربوون و ٤٩ خوێندكاری كوڕ و كچ و ٥٠ منداڵیش دەستگیرکران. 
لە ساڵانی شەستەكانەوە، ئەم شارە بۆ هەمیشە جێی ئامانجی بۆردومانی فڕۆكە و هێرشە یەك لەدوایەكەكانی هێزی سەربازیی رژێمی بەعس بووە، هاووڵاتیانی ئەم شارەش بەردەوام لە ئاوارەیی و دەربەدەریدا بوون، دوای ئەوەی کە رژێمی بەعس بەنیازی راگواستنی شارەکە بوو، چەند پیاو ماقووڵ و ریش سپی خەڵکی پشدەر، بڕیاریاندا وەكو نوێنەری ئەم دەڤەرە سەردانی دەسەڵاتدارانی رژێمەکە بكەن و داوای هەڵوەشاندنەوەی ئەم بڕیارە بكەن، بەڵام دەرئەنجام رژێمی بەعس هەڵیکوتایە سەر هۆتێلەکەیان و یەکێک لەو پیاو ماقوڵانەیان وەک بارمتە برد و هیچ کۆبوونەوەیەک ئەنجام نەدرا.

دواجار لە ٢٦ی حوزەیرانی ١٩٨٩، لە ماوەی شەش رۆژدا، دانیشتوانی پشدەر بە گشتی لە قەڵادزێ و سەنگەسەر و هێرۆ و ژاراوە راگوێزرانەوە بۆ ئۆردوگا زۆرەملێیەکان لە پیرەمەگرون و بازیان و باینجانە و تەیناڵ و کۆمەڵگەی دارەتوو و خەبات و کەورگۆسک و جەدیدەزاب و تۆبزاوە، خانوو و قوتابخانە و شوێنی گشتی و مزگەوتی شارەکەش هەموو تەقێنرانەوە و شارەکە بە ناوچەی قەدەغە دیاری کرا.

لەدوای راپەڕینی ١٩٩١ـی باشووری کوردستان و ناوچەکە، دووبارە خەڵکی گەڕانەوە بۆ شارەکە و ژیانی پێشوویان.
شایەنی باسە، لە ساڵی ٢٠١٤دا، توانرا لە دادگای باڵای تاوانەكانی عێراق بە بەڵگە و دۆسیەی تایبەت ئەم تاوانە بەکۆمەڵکوژی بسەلمێنرێت.