بەرپرسی گروپەچەکدارەکانی یەمەن رایگەیاند، لە ماوەی سێ مانگی رابردوودا لەلایەن ئەمریکا و بەریتانیاوە زیاتر وەک وەڵامدانەوە بۆ تەقاندنەوەی ٩٠ کەشتی بازرگانی لە دەریای سوور لە ٤٢٠ هێرشی ئاسمانی و مووشەکی کراوەتە سەر پێگەکانیان.دەشڵێت، "زیانێکی زۆرمان بەرکەوتووە."
ئەمڕۆ هەینی، عەبدولمەلیک بەدرەدین بەرپرسی گروپەچەکدارەکانی یەمەن لە راگەیەندراوێکدا بڵاوی کردەوە، لە ماوەی سێ مانگی رابردوودا توانیویانە ٩٠ کەشتی بازرگانی و سەربازی لە دەریای سوور بتەقێننەوە.
ئاماژەی بەوەش کرد، لەو ماوەیەشدا وەک
وەڵامدانەوەی هێرشەکانیان ئەمریکا و بەریتانیا ٤٢٤ هێرشی مووشەکی و ئاسمانی کردووەتە
سەر پێگەکانیان لە رۆژهەڵات و باشووری یەمەن. وتیشی، "گەورەترین هێرشی ئاسمانی
ئەمریکا لە مانگی رابردوودا بووە کە لە بەرەبەیاندا ٣٤ هێرشی ئاسمانی بە بەکارهێنانی
١٢٥ مووشەکی بالیستی بۆ سەر پێگەکانمان ئەنجامدرا و بەهۆیەوە زیانێکی زۆر بەر ژێرخانی
سەربازییمان کەوتووە".
عێراق لە نێوان ئاڵۆزییەکانی دەریای سور و هێڵی بازرگانی جیهان
ئاژانسی رۆیتەرز بڵاوی کردەوە، دوای
فراوانبوونی گرژی و ئاڵۆزییەکانی کەناڵی سوێس و مانەوەی کاریگەری هێرشی گروپەچەکدارەکان
بۆ دەیەکانی داهاتوو، بەنداوی فاو لە عێراق دەبێتە رێگای نوێی بازرگانانی جیهان.
باس لەوەش کراوە، دوای تەواوبوونی بەندەری
فاو عێراق دەبێتە داهاتوویەکی نوێی جوڵەی ئاویی و وشکانی لە گواستنەوەی نەوت، وزە،
کاڵا و خۆراک بۆ جیهان. وتیشی، "عێراق لە ماوەی حەوت ساڵی داهاتوودا دەبێتە
ناوەندێکی ئابووری جیهانی و بەغداش دەبێتە بەهێزترین و گرنگترین پایتەختی ئابووری
لە وڵاتانی عەرەبیدا".
لەو بارەیەشەوە، راوێژکاری گەشەپێدانی
ئابووری سەرۆک وەزیرانی عێراق بە دیجیتاڵ میدیای ئێن ئاڕ تی راگەیاند، ساڵی
داهاتوو بەندەری فاو تەواو دەبێت و دەبێتە ناوەندێکی گرنگی ئابووری جیهان و کەشتییە
بازرگانییەکان. وتیشی، "ئابووریی عێراق گەشەسەندن بە خۆیەوە دەبینێت و هەوڵەکانی
محەمەد شیاع سودانی سەرۆک وەزیرانی عێراق بۆ تەواوکردنی رێگای گەشەپێدانی ئابووری
چڕتر بوونەتەوە".
لە ماوەی رابردوودا رێکخراوی
بازرگانی و گەشەپێدانی نەتەوە یەکگرتووەکان رایگەیاند، رێژەی بازرگانی کردن لە نۆکەندی
سوێس بەهۆی هێرشی بەردەوامی هێزەچەکدارە لەیاسا دەرچووەکانی یەمەنەوە ٤٢٪ کەمبووەتەوە.