ئاماژەی بەوەش کرد، چەند فڕۆکەیەکی موشەک هەڵگری جۆری 'بی وەن' لە بنکەی لەیکنهێس لە بەریتانیاوە بە ئاڕاستەی ئاسمانی رۆژهەڵاتی ناوەڕاست کەوتنەڕێ وەک وەڵامدانەوەیەک بۆ هێرشەکانی چەند شەوی رابردوو کە بووە هۆی گیان لەدەستدانی سێ سەربازی ئەمریکی.

لەلایەکی تریشەوە ئیبراهیم رەئیسی سەرۆک کۆماری ئێران رایگەیاند، "وڵاتەکەمان بە توندترین شێوە بەرپەرچی هەر هێرشێک دەداتەوە کە ببێتە هۆی دروستبوونی مەترسی لەسەر خاکەکەمان."

وتیشی،" هێرشکردنە سەر پێگەکانی ئێران بە بیانوی هێرشی گروپەچەکدارەکان لە ئوردن بێ بنەمان."

هاوکات رۆژنامەی وۆڵ ستریت جۆرناڵ لە زاری بەرپرسانی سەربازی ئەمریکاوە رایگەیاند، بەرپرسانی سەربازی ئەمریکا بڕیاریانداوە بێدەنگ نەبن لە کوژرانی سێ سەربازی هێزەکانی ئەمریکا لە ئوردن و هەڕەشەی تۆڵەکردنەوە دەکەن.

ئەمەش لە کاتێکدایە ٢٨ـی مانگی رابردوو فەرماندەیی ناوەندیی ئەمریکا (سێنتکۆم) رایگەیاند، بنکەیەکی ئەمریکی لەسەر سنووری نێوان ئوردن و سوریا بە فڕۆکەی بێفڕۆکەوان کراوەتە ئامانج و بەهۆیەوە سێ سەربازی ئەمریکی کوژراون و چەند سەربازێکی دیکەیان بریندار بوون.

دواتر واشنتن گروپەچەکدارەکانی نزیک لە ئێرانی بە ئەنجامدەری هێرشەکە تۆمەتبار کرد و پشتڕاستی کردەوە کە وەڵامی ئێران دەداتەوە.