ئەمڕۆ بۆ دووەمین جار بەهای دۆلار بەرامبەر بە دیناری عێراقی دابەزی، لە ئێستادا هاوڵاتیان ١٠٠ دۆلاری ئەمریکی بە ١٤٦ هەزار و ٧٥٠ دینار دەتوانن بفرۆشنە نووسینگەکانی ئاڵوگۆڕی دراو و ئەگەر بشیانەوێت دۆلار بکڕن، بە ١٤٧ هەزار و ٧٠٠ دینارە.
ئەمڕۆ شەممە، نرخی دۆلار دابەزینی بەرچاوی بەخۆیەوە بینی و ئەمەش دووەمجارە لەمڕۆدا نرخەکەی دابەزین تۆماربکات.
ماوەی زیاتر لە شەش مانگە بەهای دۆلار ناجێگیرە و ئەو
نرخەی ئێستا نزمترین ئاستی شەش مانگی رابردووە.
بەهۆی سەپاندنی سزای وەزارەتی گەنجینەی ئەمریکا بەسەر
بانکی ناوەندی عێراقدا خستنەڕووی دۆلار بۆ خوار ١٠٠ ملیۆن دۆلاری رۆژانە کەم بووە
و بەوەش بەهای دۆلار تا ١٧٧ هەزار دینار بەرزبووە.
هۆکاری سەپاندنی سزاکان بۆ سەر عێراق مامەڵەکردن بوو بە
دۆلارەوە لەدەرەوەی سیستمی ئەلکترۆنی و بە قاچاغ بردنی دۆلار بۆ وڵاتانی دیکە بە
نایاسایی.
دوای چەند مانگێک شاندێکی عێراق بە سەرۆکایەتی فواد حوسێن
وەزیری دەرەوەی عێراق سەردانی ئەمریکایان کردووە، شاندەکە لەگەڵ ئەمریکا گەیشتنە رێککەوتن
و ناردنی دۆلار ئاسایی بووەوە، دواتر حکومەتی عێراق پێشنیارێکی بانکی ناوەندی عێراقی
بۆ دابەزاندنی دۆلار لە ١٤٦ هەزار دینارەوە بۆ ١٣٠ هەزار دینار پەسەندکرد.