وتەبێژی وەزارەتی نەوتی عێراق رایگەیاند، لە ئازاری رابردوو بڕی ١٠٠ ملیۆن و ٩١٣ هەزار و ٢٧ بەرمیل نەوت بە بەهای زیاتر لە حەوت ملیار دۆلار فرۆشراوە.
عاسم جیهاد وتەبێژی وەزارەتی نەوتی عێراق بە رۆژنامەی سەباحی فەرمی عێراقی راگەیاند، داهاتی نەوتی مانگی ئازاری رابردوو حەوت ملیار و ٤٠٤ ملیۆن دۆلار بووە و بڕی ١٠٠ ملیۆن و ٩١٣ هەزار و ٢٧ بەرمیل نەوت فرۆشراوە.
ئاماژەی بەوەشدا، رۆژانە سێ
ملیۆن و ٢٥٥ هەزار بەرمیل نەوت هەناردەکراوە و نرخی هەر بەرمیلێکیش بە ٧٣ دۆلار و ٣٧ سەنت فرۆشراوە.
ئەوەشی خستەڕوو، ژمارەی پرۆسەکانی
هەناردەکردن و داهاتی پەیداکراو بە جێبەجێکردنی سیاسەتی شەفایەتی تایبەت بە وەزارەتی
نەوتی عێراق بڵاوکراوەتەوە.
هاوکات، وەزارەتی نەوتی
عێراقیش راگەیەنراوێکی بڵاوکردەوە و تیایدا هاتووە، بڕی ئەو نەوتەی لە کێڵگەکانی
کەرکوک رەوانەی بەندەری جەیهان کراوە یەک ملیۆن و ٧٢٧ هەزار و ٤٩٤ بەرمیل بووە.
دەشڵێت، لە کێڵگەکانی
ناوەڕاست و باشوری وڵات بڕی ٩٨ ملیۆن و ٨٧٥ هەزار و ٦٩٢ بەرمیل نەوت فرۆشراوە.
ئەمە لەکاتێکدایە، مانگانە
حکومەتی فیدڕاڵی بڕی نەوتی فرۆشراو و ئەو داهاتەی دەستی کەوتووە بڵاودەکاتەوە.
لەبەرامبەردا حکومەتی ماوەبەسەرچووی هەرێم هەر شەش مانگ جارێک لە رێگەی کۆمپانیای
دیلۆیتەوە بڕی نەوتی فرۆشراو و داهاتەکەی بڵاودەکاتەوە کە بەردەوام گومانی لەسەرە
و بەشێک لە داهاتیش بە ناڕوونی دەمێنێتەوە.