دەستەی کەشناسی عێراق رایگەیاند، پێشبیندەکرێت سبەینێ سێشەممە لە هەرێم نمە باران ببارێت و تاکۆتایی هەفتەش پلەکانی گەرما جێگربن.
ئەمڕۆ دووشەممە، دەستەی کەشناسی عێراق راگەیەنراوێکی بڵاوکردەوە و تیایدا هاتووە، سبەینێ سێشەممە، پێشبینیدەکرێت ئاسمانی وڵات ساماڵ بێت و کەمێک پەڵە هەوری هەبێت لە ناوەڕاست و باشوردا. لە هەرێم پەڵە هەوری دەبێت و ئەگەری بارینی نمەباران دەبێت. بەڵام پلەکانی گەرما لەسەرتاسەری وڵاتدا هیچ ناگۆڕێت.
لەبارەی پێشبینی کەشوهەوای
رۆژی چوارشەممەوە راگەیەنراوەکەی کەشناسی ئاماژەی بەوە داوە، ئاسمانی وڵات ساماڵ دەبێت
و هیج گۆڕانێک لە پلەکانی گەرمادا روونادات.
ئەوەشی خستووەتەڕوو،
رۆژانی پێنجشەممە و هەینی لەسەرتاسەری وڵاتدا هیچ گۆڕانێک لە پلەکانی گەرمادا
روونادەن و ئاسمانیش ساماڵ دەبێت.
ئەمە لەکاتێکدایە، دوێنێ
عامر جابری بەڕێوەبەری راگەیاندنی دەستەی باڵای کەشوهەوای عێراق بە ئاژانسی هەواڵی
عێراقی راگەیاند، کاتی باران بارینی مامناوەند لە عێراق دەستیپێکردووە و پلەکانی گەرماش
بەرەو دابەزین دەچن پاش ئەوەی چەند رۆژی رابردوو بەشێوەیەکی بەرچاو بەرزبووبوونەوە.