سەرۆک وەزیرانی عێراق رایگەیاند، هیوادارن رێوشوێنەکانی بەنیشتیمانیکردنی مووچەی فەرمانبەرانی هەرێم بەردەوام بێت تاوەکو بڕیارەکانی دادگای فیدڕاڵی جێبەجێ بکرێت. دەشڵێت، "پارەی تەواومان تەرخان کردووە و کۆمسیۆنمان راسپاردووە بۆ ئەنجامدانی هەڵبژاردنی پەرلەمانی کوردستان لە وادەی خۆیدا".
ئەمڕۆ هەینی، محەمەد شیاع سودانی سەرۆک وەزیرانی عێراق رایگەیاند، کێشەکانی نێوان حکومەتی عێراق و هەرێم کێشەی هونەری و تەکنیکین نەوەک کێشەی سیاسی.
ئاماژەی بەوەش کرد، راگرتنی هەناردەی نەوتی هەرێم بووە هۆی
دروستبوونی کێشەی مووچەی مووچەخۆرانی هەرێم و ئەگەر ئێستا هەرێم داهاتی نەوتی و
نانەوتی رادەستی بەغدا بکات ئەوا بە رێژەی ١٢.٦٧٪ـی بودجەی عێراقی پێ دەدرێت.
ئەوەشی خستە روو، مووچەی مانگی شووبات و ئازاری مووچەخۆرانی
هەرێمیان خەرج کردووە و داوا دەکەن رێکارەکانی بە نیشتیمانیکردنی مووچە دەستپێبکەن
تاوەکو بەردەوامبن لە خەرجکردنی مووچەی مووچەخۆرانی هەرێم.
سەبارەت بە هەڵبژاردنیش باسی لەوە کرد، لە ئێستادا هەرێم
پەرلەمانی نیە و هەڵبژاردنیش نەکراوە ئەوەش دەبێتە هۆی نەمانی شەرعیەتی حکومەتی هەرێم.
وتیشی، "پارەی تەواومان خەرج کردووە و کۆمسیۆنمان راسپاردووە بۆ ئەنجامدانی هەڵبژاردنی
پەرلەمانی کوردستان لە وادەی دیاریکراوی خۆیدا".