ئاماژەی بەوەش کرد، بە گوێرەی پلانەداراییەکان پێویستە لە بودجەی ئەمساڵی عێراقدا بە تەواوی حکومەت پشتگیرى دارایی و چاکسازی پێشکەش بە کەرتى تایبەت و کەرتى کشتوکاڵی ناوخۆیی و دەرەکی بکات، لە هەمان کاتیشدا سەرچاوەی خەرجی و داهاتەکانى بودجەى ئەمساڵیش دەستنیشان بکرێت.

باسی لەوەش کرد، سەرجەم داهاتە نەوتییەکانی عێراق بە گوێرەی رێککەوتنەکانی نێوان وەزارەتی دارایی و وەزارەتی گەنجینەی ئەمریکا دەچێتە بانکی فیدڕاڵی ئەمریکا و بەشێوەى حەواڵە بە رێژەیەکی دیاریکراوی مانگانە لەرێگای هەژماری بانکیی تایبەت بە بانکی ناوەندی عێراق رەوانەی وەزارەتی دارایی عێراق دەکرێتەوە. وتیشی، "حکومەت هەوڵی تەواوەتی داوە بۆ پارێزگاری کردن لە سەرچاوەکانی داهات و خەرجی کە پەیوەستن بە دابینکردنی مووچەی مووچەخۆرانی عێراق و هەرێمەوە".

ئەوە لەکاتێکدایە، دادگاى فیدڕاڵى بۆ چارەسەرکردنی کێشەی مووچەی مووچەخۆران لە نێوان هەرێم و بەغدا بە بڕیارێک هەریەک لە عێراق و حکومەتى کاربەڕێکەرى هەرێمی پابەندکردووە بە چارەسەرکردن و جیاکردنەوەی کێشەی مووچە لە پابەندییەکانی هەرێم و داهاتی ناوخۆ.

لەلایەکى دیکەوە، یەکێک لە ئاستەنگەکانى بەردەم دەستپێکردنەوەى هەناردەى نەوتى هەرێم بریتییە لە پێداچوونەوە و دووبارە خوێندنەوە بە تێچووی دەرهێنان و گواستنەوەى نەوت و گرێبەستەکانی هەرێم بە گوێرەی بودجەی سێ ساڵە کە بووەتە گرفتی سەرەکی نێوان بەغدا و هەرێم و بەتایبەتیش قەرزی کۆمپانیا نەوتیەکانی هەرێم .