کام لایەنی ئۆپۆزسیۆن جورئەتی چوونە
پەڕلەمان دەکات لەگەڵ یەکێتیی یان پارتیی؟

408 جار خوێندراوەتەوە

هێزە ئۆپۆزسیۆنەکان لەکوردستان، نایانەوێت بچنە هۆڵی پەڕلەمان گەر پارتیی یان یەکێتیی یەکێکیان بایکۆتی دانیشتن بکات، بەڵام بەلایانەوە ئاساییە، گەر ئەو دووهێزە ڕێکبکەون و دواتر بە بانگەوازێک بۆ دانیشتنی پەڕلەمان ئەوانیش بەشداری بکەن، ئەوەی ڕوودەدات و نەدەبوو ڕووبدات ئەو بێ جورئەتیەی هێزەکانی ئۆپۆزسیۆنە، کە ئامادەنین بەبێ ڕێککەوتنی یەکێتیی و پارتیی ئامادەی دانیشتنی پەڕلەمان بن و نیسابی یاسایی تەواو بکەن، لەگەڵ هەرلایەنێک کەبیەوێت پەڕلەمان کارابکرێتەوە! لەڕاستیدا ئەمەیە ئێمە دەڵێین هێزەکانی ئۆپۆزسیۆنیش تەواوکەری ئەجێنداو سیاسەتیی هێزەکانی دەسەڵاتن.

ئاخر هێزگەلێک خۆی بەئۆپۆزسیۆن بناسێنێت و بانگەشەو بانگەوازی بۆئەوەبێت کە ئەوان بەدیلی دەسەڵات و خاوەن پەیام و پرۆژەی جیاوازن، چ پێویستە لەترسی تەخوینی ئەویتر یان کەسانێکی بێ ئاگا کەپێی وایە، گەر هەرلایەنێک بەدەم بانگەوازی دانیشتنی پەڕلەمانەوە بچێت، ئیتر مانای وایە، خزمەتە بۆ حیزبەکانی دەسەڵات، بۆمەگەر ئیش و چالاکی ئێوە هەرلەنێو پەڕلەمانەوە نیە؟ ئەی ئیتر بۆ دەبێت ئەوترسە هەبێت و لای کەسانێکی تریش خۆ فرۆشیە بەدەسەڵات! بۆیە هەر بیانوو هێنانەوەیەک بۆ ئەودۆخە، جگە لە غیاب بوونی ئۆپۆزسیۆنی راستەقینە هیچی تر هەڵناگرێت و پێویستە دەستیان هەبێت لەچالاککردنەوەی پەڕلەمان و پرۆژە و بەرنامەی تایبەت بەخۆیان هەبێت، نەک چاوەڕێبکەن، بزانن دوو هێزە دەسەڵاتدارەکە چی دەکات و چاوەڕێی چین.