عێراق لەبارەى ئەو گرتوخانانەی چەکدارانی داعش و سەرکردەکانیانی تێدایە هۆشداریدا و رێنمایى دەرکردووە رێوشوێنەکان توندتر بکرێتەوە و داوای کردووە ئەوپەڕى وریایى هەبێت.
میدیا عێراقییەکان بەزانیاری وەرگرتن لە چەند چاوگێکى ئەمنییەوە بڵاویان کردەوە، رێنمایى ئەمنى باڵا دەرکراوە بۆ توندکردنەوەى پاسەوانیەتیکردنی ئەو گرتوخانانەی سەرکردە و گیراوانى ئەندامانى داعشیان تیایە.
ئاماژە بەوەشکراوە، رێوشوێنى توند لە بەندیخانەکانى
(تاجى، الکفل، الحوت) گیراونەتەبەر.
هاوکات، دەرکردنی ئەو رێنماییانەش پاش هێرشەکەى
بەندیخانەى (غوێران) لە حەسەکەى رۆژئاوای کوردستان و هەڵهاتنی ئەندامانى داعش دێت کە
تا ئێستا شەر بەردەوامە و بەشێک لە هەڵهاتووەکان دەستگیرکراونەتەوە و بەشێکی
دیکەیان هێشتە لە شەڕدان لەگەڵ هێزەکانی سوریای دیموکرات هەسەدە.
ئەمەش لە کاتێکدایە، ماوەی زیاتر لە مانگێکە
جموجۆڵی چەکدارانی داعش لەسنوری هەردوو وڵاتی سوریا و عێراق دەستیپێکردووەتەوە و چەندین
جار هێرشیان کردووەتەوە سەر هێزەکانی سوپای عێراق و هێزەکانی پێشمەرگە و هێزەکانی
سوریای دیموکرات لە رۆژئاوای کوردستان و کۆتا هێرشیان بەرەبەیانی دوێنێ بوو بۆ سەر
بنکەیەکی سوپای عێراق و بەهۆیوە ١١ سەرباز کوژران.