ناوبراو ئاماژەی بەوەشکرد، زۆر گرنگە بەزووترین کات پڕۆژەیاسای بودجە بچێتە پەرلەمان و پەسەند بکرێت، و ڕوونی کردەوە کە دواکەوتنی مووچە لە ئێستادا بەشێکی پەیوەندی بە هەرێم و هەندێکیشی بە بەغدادەوە هەیە.

سەبارەت بە دۆخی هەرێمی کوردستان و قەیرانەکان، وەزیری ژینگە جەختی کردەوە کە بەرپرسانی هەرێم شەڕی بەرژەوەندیی خۆیان و حیزبەکانیان دەکەن، و بە بەغدایان وتووە ٥٠ هەزار بەرمیل نەوتمان پێدەن و حەقتان بە هەرێمەوە نەبێت، هەروەها ئەوان بۆیە نایانەوێت بەنزین و نەوت لە بەغداوە بێت چونکە خۆیان لێی سودمەندن.

باسی لەوەشکرد، داهاتی هەرێم زۆر زیاترە لە ١٢٠ ملیار دینار و بەغداش ئەو ڕاستییە دەزانێت، نەوەی نوێش لە پەرلەمان دەنگی بەرزکردەوە و واژۆی کۆکردەوە بۆ گرانی بەنزین لە هەرێم.

لە تەوەرێکی تری قسەکانیدا، ناوبراو باسی لەوە کرد کە عەلی زەیدی خاوەنی حزبی سیاسی نییە و بێباکە لەوەی لە داهاتوودا دەنگ دەهێنێت یان نا، و پێی وایە لە دامەزراندن و خەرجکردنی پارەی حکومەت هەڵەی گەورە کراوە و دەبێت گۆڕانکاریی گەورە لە شێوازی بەڕێوەبردنی دامەزراوەکانی وڵاتدا بکرێت.

ڕاشیگەیاند کە هیچ وەزیر و بەرپرسێک بۆی نییە گرێبەست واژۆ بکات هەتا نەگەڕێتەوە بۆ دیوانی چاودێری دارایی، و لە هەموو وەزارەت و دامەزراوەکانی حکومەتدا گەندەڵی هەیە و ئەو مکوڕە لەسەر هەنگاوەکانی بۆ بنەبڕکردنی.

سەبارەت بە دۆخی دراوی عێراقیش، ئەوەی خستەڕوو کە لە کۆبوونەوەی ئەنجومەنی وەزیرانی عێراق گفتوگۆ لەبارەی گۆڕینی دراوی وڵات و لابردنی سێ سفرەکەی کراوە و پڕۆژەیەک هێنراوەتە ناو کۆبوونەوەکەوە، بەڵام تا ئێستا هیچ بڕیارێکی کۆتایی لەسەر نەدراوە، و باشترین چارەسەریش ئەوەیە کە پارەی کاش نەمێنێت و ببێت بە کارتی بانکی.

لە بواری ژینگەشدا، سروە عەبدولواحید ڕایگەیاند کە لە ماوەیەکی کەمدا هەنگاوی گرنگیان داوە و پێشتر دامەزراوەکان گوێیان بە ڕاپۆرت و بڕیارەکانی وەزارەتی ژینگە نەداوە بەڵام ئێستا وانییە، و لە دادگای فیدڕاڵییەوە داوایان کردووە ئەو شوێنە حکومییانەی ژینگە پیس دەکەن سزابدرێن، هەروەها یاسای ژینگە هەموار دەکەنەوە و سزای زیندانیکردن بۆ سەرپێچیکاران زیاد دەبن.

وتیشی، کە هاوپەیمانیی نێوان نەوەی نوێ و یەکێتی لەسەر بنەمای دامەزراندنی حکومەتی هەرێمە، و هیوادارین پارتی بەخۆیدا بچێتەوە و سیاسەتی بگۆڕێت، چونکە پارتی دەیەوێت خۆی بەسەر لایەنەکانی دیکەدا بسەپێنێت و لە سیاسەتدا برای گەورە بوونی نییە.