لە سکاڵاکەدا هاتووە، گوایە شاسوار عەبدولواحید ناوزڕاندن (تەشهیر)ـی بەرامبەر سکاڵاکار کردووە و پێی وتووە کە لەناو هێزە ئەمنییەکاندایە، وە ئەو سکاڵاکارە دەڵێت، ئەو پیشەی رۆژنامەنووسە نەوەک کەسێک لەناو هێزە ئەمنییەکاندا.

پارێزەرانی شاسوار عەبدولواحید لەم بارەیەوە دەڵێن، ئەم سکاڵایە هیچ بەڵگەیەکی یاسایی نییە و سکاڵاکار بە ئاشکرا لەناو هێزە ئەمنییەکاندایە و بە تەشهیر لێکدانەوەی بۆ کراوە.

پێشتریش دیجیتاڵ میدیای ئێن ئاڕ تی وێنەی سکاڵاکاری بڵاوکردووەتەوە کە بە ئاشکرا دەردەکەوێت لە هێزە ئەمنییەکانی یەکێتییە و تەنانەت جلوبەرگەکەشی لە وێنەکەدا ئەوە پشڕاست دەکاتەوە.

ئەمەش لەدوای ئەوەدێت، لە ١٢ـی ئابی ٢٠٢٥، درەنگانی شەو هێزێکی ئەمنی هەڵیانکوتایە سەر ماڵەکەی شاسوارعەبدولواحید و بەبێ ئاگاداری پێشتوەختە دەستگیریانکرد، گوایە لەسەر چەند سکاڵایەک کە تا ئێستا لە دادگای سلێمانی بەڵگەیان لەسەر نەهاتووەتەوە؛ دادگای سلێمانی سزای پێنج مانگ زیندانیکردنی بەسەردا سەپاند.

کاردانەوەکان لەبارەی ئەم پرسەوە بەردەوامبوون و میدیا ناوخۆییەکان و دەرەکییەکان ئەوەیان خستەڕوو، کە دەستگیرکردنی سەرۆکی جوڵانەوەکە لەدوای ئەوەهات، کە هەفتەیەک پێش ئەوە شاسوار عەبدولواحید رایگەیاندبوو، ئەگەر هەرێم چارەسەری کێشەی مووچە نەکات و لەگەڵ بەغدا رێکەوتنەکانی جێبەجێ نەکات؛ ئەوا هەڵوێستی جدییان دەبێت؛ وە لەدوای دەستگیرکردنیشی، پەرلەمانتارانی نەوەی نوێ جەختیان کردەوە، کە سەلامەتی گیانی سەرۆکی جوڵانەوەکە لە ئەستۆی یەکێتیدایە.