لە کۆبوونەوەی لیژنەی باڵای هەماهەنگی نێوان عێراق و ئەمریکادا هەردوولا پابەندی خۆیان دوپاتکردەوە بۆ بە بەردەوامیدان بە چاکسازی دارایی لە عێراق و بڕیاریاندا هاوکارییە داراییەکان نێوان هەردوو وڵات زیاتر بکەن.
شاندی عێراق بە سەرۆکایەتی محەمەد تەمیم وەزیری پلاندانانی عێراق و شاندی ئەمریکاش بە سەرۆکایەتی ئەنتۆنی بلینکن وەزیری دەرەوەی ئەمریکا کۆبوونەوەی لیژنەی باڵای هەماهەنگی نێوان عێراق و ئەمریکایان ئەنجامدا و لە کۆبوونەوەکەدا باس لە فراوانکردنی پەیوەندییەکانی نێوان هەردوو وڵات لە بوارەکانی وزە و چاکسازی دارایی و پێکەشکردنی خزمەتگوزاری بە عێراق و بەهێزکردنی دیموکراسی کرا.
لە کۆبوونەوەکەدا، هەردوولا پابەندی
خۆیان دوپاتکردەوە بۆ بە بەردەوامیدان بە چاکسازی دارایی لە رێگەی بەرەنگاربوونەوەی
گەندەڵی و رێگری کردن لە بەکارهێنانی کەرتی دارایی بەشێوەی نایاسایی.
هەروەها، لە کۆبوونەوەکەدا هەردوو وڵات
بڕیاریاندا هاوکارییە داراییەکان نێوانیان زیاتر بکەن لەرێگەی بەرزکردنەوەی پەیوەندی
نێوان لایەنە سەرەکییەکانی حکومەتی عێراق و وەزارەتی گەنجینەی ئەمریکا.
لەلایەکی دیکەشەوە، کۆمپانیای دارایی
گەشەپێدانی نێودەوڵەتی ئەمریکا بڕیاریدا بە پێدانی بڕی ٥٠ ملیۆن دۆلار بە قەرز بە
بانکی نیشتمانی عێراق، بە مەبەستی پێدانی قەرز بە کۆمپانیا بچووک و مامناوەندەکان.
لە تەوەرێکی دیکەی کۆبوونەوەکەدا، هەردوولا
جەختیان لە گرنگی دەستپێکردنەوەی هەناردەکردنی نەوت لە رێگەی بۆریی عێراق - تورکیا
کردەوە.