پاش ئەوەی بەهۆی ئاڵۆزییەکانی رۆژی ٩ـی شوبات لە دەریای سور و وەڵامدانەوەکانی ئەمریکا و بەریتانیا نەوت بەرزبوونەوەی بەخۆیەوە بینی، ئەمڕۆ نرخەکەی یەک دۆلار و ٥٩ سەنت بەرزبووەتەوە و بەگوێرەی پێنوێنی بازاڕی جیهان یەک بەرمیل نەوتی برێنت بە ٨٢ دۆلار و ٧٨ سەنت مامەڵەی پێوە دەکرێت.
ئەمڕۆ هەینی، بەرمیلێک نەوتی خاوی تێکساس بە ٧٨ دۆلار و هەشت سەنت مامەڵەی پێوەدەکرێت و هاوشێوەی نەوتی خاوی برێنت نرخەکەی بەرزبووەتەوە.
شەوی رابردوو، فەرماندەیی
ناوەندی ئەمریکا رایگەیاند، چوار هێرشیان کردووەتە سەر بارەگای گروپەچەکدارەکانی یەمەن
و بەهۆیەوە حەوت موشەکی دژە کەشتیان تێکشاندووە لەگەڵ چەندین کەرەستەی جەنگی هێزەچەکدارەکان.
ئەوەش لە کاتێکدایە، حەیان عەبدولغەنی وەزیری نەوتی عێراق رایگەیاند،
عێراق بەردەوام دەبێت لە کەمکردنەوەی هەناردەکردنی ١٥٠ هەزار بەرمیلی رۆژانە کە لە
مانگی رابردوودا لەسەر بەردەوامبووە و ئامانج لێی بەدەستهێنانی سەقامگیری و هاوسەنگی
زیاترە لە نێوان دابینکردن و داواکاری لە بازاڕە جیهانییەکان.
ئاماژەی بەوەش کرد، رێکخراوی ئۆپیک پڵەسیش بڕیاریدا ئاستی بەرهەمهێنان
بەبێ دەستکاریکردن بۆ ئەمساڵیش وەک خۆی بهیڵێتەوە.
لەلایەکی تریشەوە رێکخراوی جیهانی ئۆپیک پڵەس رایگەیاند، ئاستی دابینکردنی
نەوتی رۆژانە و ساڵانە پارێزراوە و بەردەوامیش دەبن لە کەمکردنەوەی بەرهەمهێنان و
هەناردەکردن بۆ بازاڕەکانی جیهان تا مانگی ئازاری ئەمساڵ بە مەبەستی سەقامگیرکردنی
بازاڕەکانی جیهان.