وەزارەتی دەرەوەی شانشینی سعودیە رایگەیاند، پەیوەندییەکانی نێوان سعودیە و ئیسرائیل ئاسایی نابنەوە، تاوەکو ئیسرائیل بە تەواوی لە خاکی غەززە نەکشێتەوە و گەلی فەڵەستین نەبن بە خاوەنی دەوڵەتی خۆیان.
ئەمڕۆ چوارشەممە، وەزارەتی دەرەوەی سعودیە رایگەیاند، گفتوگۆکانی نێوان سعودیە و ئەمریکا لەبارەی رێگای ئاشتی نێوان عەرەب و ئیسرائیل بەردەوام دەبێت.
ئاماژەی بەوەش کرد، هەڵوێستی
شانشینی سعودیە سەبارەت بە پرسی فەلەستین و پێویستی بەدەستهێنانی مافە رەواکانی گەلی
فەلەستین پتەو بووە و هەرواش دەمێنێتەوە.
ئەوەشی خستە روو، پەیوەندییەکانی
نێوان ئیسرائیل و سعودیە ئاسایی نابنەوە، تاوەکو هێرشەکانی ئیسرائیل بۆ سەر کەرتی
غەززە رانەگیرێن و گەلی فەڵەستین نەبن بە خاوەنی دەوڵەتی خۆیان و قودس پایتەختی دەوڵەتەکەیان
بێت.
رۆژی رابردوو، جۆن کێربی
وتەبێژی ئەنجوومەنی ئاسایشی نەتەوەیی ئەمریکا رایگەیاند، ئیدارەی جۆ بایدن وەڵامێکی
ئەرێنی وەرگرتووە لەبارەی ئاسایی بوونەوەی پەیوەندییەکانی نێوان ئیسڕائیل و سعودیە.
پێشتر، ئیسحاق ھێرزۆگ
سەرۆک کۆماری ئیسڕائیل باسی لەوە کرد، ئاسایی بوونەوەی پەیوەندییەکانی وڵاتەکەی لەگەڵ
سعودیە بە مانای کۆتایی هێنان بە شەڕە لە ناوچەکەدا.