لە ئێستادا لە سەرجەم بازاڕی دراوەکانی هەرێم نرخی دۆلار گۆڕانکاری بەسەردا هاتووە و هەر ١٠٠ دۆلارێک بە ١٥١ هەزار و ٧٥٠ دینار مامەڵەی پێوەدەکرێت و بەراورد بە رۆژی رابردوو ٢٥٠ دینار دابەزینی بەخۆیەوە بینیوە.
ئەمڕۆ چوارشەممە، بە گوێرەی هێڵکاری بازاڕی دراوەکانی هەرێم لە ماوەی ئەم هەفتەیەدا دۆلار زیاتر لە ٣٠ جار گۆڕانکاری کتوپڕی بەسەرداهاتووە و تێکڕای نرخەکانیش لە نێوان ١٥١ هەزار تا ١٥٢ هەزار و ٨٥٠ دینار بووە.
لەلایەکی تریشەوە بۆ کۆنترۆڵکردنی نرخی دۆلار و بەتایبەت
دۆلاری گەشتیاران پارێزگاری بانکی ناوەندی عیراق رایگەیاند، سەبارەت بە فرۆشتنی دۆلار
بە گەشتیاران، بەمزوانە میکانیزمێکی نوێ کارا دەکەن بۆ دڵنیابوون لەوەی تەنها گەشتیاری
راستەقینە بتوانێت دۆلار وەربگرێت و رێگری لەو کەسانە بکرێت بە ناوی گەشتیارەوە دۆلار
بە نرخی فەرمی وەردەگرن.
باسی لەوەش کرد، بانکی ناوەندی یەدەگی پێویستی هەیە و لە
دۆخێکی جێگیردایە بۆ وەڵامدانەوەی داواکارییەکان بۆ کڕینی دۆلار.
ئەوەش لە کاتێکدایە، بانکی ناوەندی عێراق رایگەیاند، لە
ماوەی مانگی رابردوودا بەتێکڕا زیاتر لە چوار ملیار دۆلاری بە نرخی فەرمی فرۆشتووە
بەبانک و بازرگانانی ناوخۆ و لەو رێژەیەش ٩١٪ بەشێوەی حەواڵە بووە و تەنها ٩٪ بەشێوەی
کاشبووە کە زیاتر بووە لە ٣٣١ ملیۆن دۆلار.