لەلایەکی دیکەشەوە عەبدولوەهاب مەحمود بەرێوەبەری ناحیەی حاجی ئۆمەران بە ئێن ئاڕ تی راگەیاند، تاکو ئێستا ھیچ و رێنماییەک بۆ دابەشکردنی نەوت و نرخەکەی بۆ ئەوان نەچووە و ھیچ شتێکی فەرمیان پێنەگەیشتووە.

ئەوەش لە کاتێکدایە، ئەمڕۆ بەڕێوەبەرایەتی ناحیەی قەسرێ رایگەیاند، "بریکارەکانی خۆراک لە سنورەکەمان ئاگادار دەکەینەوە، وەرگرتنی نەوتی سپی لەسەر لیستی مانگی ٩ دەبێت و بۆ یەک بەرمیل نەوت بڕی ١٠٢ هەزار و ٥٠٠ دینار دیاریکراوە،بە مەبەستی دابەشکردنی نەوت پارەکە وەردەگیرێت. کە بڕی ١٥٠٠ بۆ بریکاری خۆراکە."

ئەوەش دوای ئەوە دێت، لەماوەی رابردوودا عێراق بڕیاریدا بەوەی نەوتی سپی ماڵان بۆ هاوڵاتییانی هەرێم بنێرێت و نرخەکەی ٣٠ هەزار دینار بێت، بەڵام لەدوای گەیشتنی نەوتەکە بە هەرێم، لە هەرێم بە زیاتر لە ١٠٢ هەزار دینار دەدرێتە هاوڵاتی. کە ئەوەش ناڕەزایەتی زۆری هاوڵاتییانی بەدوای خۆیدا هێناوە و باس لەوەدەکەن، کە ئەو نرخە زۆرە و دوو هێندەی ساانی رابردووە، لە کاتێکدا سەرجەم کەرستە و پێداویستی و خۆراکەکانی دیکە نرخیان گران بووە.

لە رۆژی ١٠ی ئەم مانگەدا، لەسەر داوای فراکسیۆنی نەوەی نوێ، موستەفا کازمی سەرۆکوەزیرانی پێشووی عێراق بریاریدا ١٥٠ ملیۆن لیتر نەوتی سپی بۆ هەرێمی کوردستان بنێرێت. کە بەپێی ئەو داواکارییەش، هەموو ماڵێک لە هەرێم لەم وەرزی زستانەدا بەرمیلێک نەوت وەردەگرێت.

گرانی نرخی نەوت لە هەرێمدا ناڕەزایەتی زۆری لای هاوڵاتیان دروستکردووە و لە ئێستاشدا یەک بەرمیل نەوتی سپی بەبێ پسوڵەی دابەشکردنی خۆراک و ئەگەر هاوڵاتیی بیەوێت خۆی بیکڕێت، زیاترە لە ٢٥٠ هەزار دینار.
کەریم کەیفی، سۆران
ئومێد چۆمانی، هەولێر
هـ.ئـ