دەسەڵاتی دادوەری ئێران رایگەیاند، چوار کەسی دیکە لە بریندارانی رووداوی ئاگرکەوتنەوەی زیندانی ئەوین لە تارانی پایتەختی ئێران و رووبەڕووبوونەوەی زیندانیان و چاودێرەکانی زیندان، گیانیانلەدەستداوە و بەمەش تا ئێستا هەشت کەس گیانیان لەدەستداوە.
بەگوێرەی راپۆرتێکی میدیا ئیسنای فەرمی ئێرانی، بەشێک لەو زیندانیکراوانەی زیندانی ئەوین کە بەهۆی رووبەڕووبوونەوەکانی رۆژی شەممە برینداربوون، بارودۆخی تەندروستییان ناجێگیر بووە و ئێوارەی دوێنێ یەکشەممە گیانیان لەدەستداوە.
هاوکات، ئاماژە بەوەشکراوە تا ئێستا بەهۆی رووداوەکەوە هەشت کەس گیانیان
لەدەستداوە و شەش کەس کە بریندارن لە نەخۆشخانە لە ژێر چاودێری پزیشکیدان.
لە کۆتایی راپۆرتەکەی دەسەڵاتی دادوەری ئێران، ناسنامەی کوژراوەکانی ئاشکرا نەکردووە بەڵام ئاماژەی بەوەداوە بەکەسوکاریان ئاگادار کراوەتەوە و بە دوای فەرمانی دادگا ناوەکانیان بە ئاشکرا بڵاودەکرێتەوە."
ئەمە لەکاتێکدایە، میدیای فه‌رمی ئێران (ئێرنا) بڵاویکردەوە، شەوی شەممە
زیندانی ئەوین گڕی گرتووە و به‌هۆی شه‌ڕ و رووبه‌ڕووبوونه‌وه‌ش لەنێوان ژماره‌یه‌ك
زیندانی گرتووخانه‌کە و هێزه ئه‌منییه‌كانی گرتووخانه‌كه، هه‌شت كه‌س برینداربوون.
له‌باره‌ی هۆكاری ئاگركه‌وتنه‌کەوە ئاماژە بەوە کراوە، زیندانییه‌كان هەوڵیان
داوە زیندانەکە بشکێنن، بەو هۆیەوە رووبەڕووبوونەوە روویداوە و بەشێکی زیندانەکە
ئاگری گرتووە.
زیندانی ئەوین لە تاران گەورەترین زیندانی ئێرانە و بەشێک لە به‌ناوبانگترین
چالاکوان و پارێزەرانی ئێران و کەسانی دژبە دەسەڵات و چالاکوانانی سیاسی لەوێ زیندانیی
کراون، کە چەندین چالاکوان و سیاسی کوردیان تێدایە.
زیندانەکە ساڵی ١٩٧١ لە سەردەمی محەممەد رەزا پەھلەوی بە مەبەستی زیندانیکردنی
زیندانییانی سیاسی دروستكراوە.