کوت و بەندکرنا پێنگاڤێن مەدەنی ل دھۆکێ بزاڤەکا شکەستن خواری یە

8056 جار خوێندراوەتەوە

کوت و بەندکرنا پێنگاڤێن مەدەنی ل دھۆکێ بزاڤەکا شکەستن خواری یە و قوربانیدانا ئازادیخوازان ژی ب ھەدەرناچت
پرسا ئازادیێ ل ھەرێما کوردستانێ ل ژێر پرسیارانە ب تایبەت پارێزگەھا دھۆکێ، چەمکێ ئازادیێ ل دھۆکێ ھاتیە بێ واتە کرن! دەنگێ نەرازی و ھێزا ئازادیخوازان ل دھۆکێ ل ژێر سیبەرا ئازادیێ بلند نەبوویە و گەشە نەکریە، بەلکو ب روحیەتا خۆراگری و قوربانیدانێ گەشەکریە و د ڤەژینێ دایە.
د نوکە دا دھۆك د رەوشەکا گەلەك خراب یا مافێن مرۆڤی و ئازادیان دایە. ھەمی ھەول و بزاڤ دھێنە کرن کو پرسێن مەدەنی و پێنگاڤێن مەدەنی بھێنە کوت و بەند کرن و ھەمی ئەو پرسێن گرێدایی ب مافێن مرۆڤی یان ژی ئازادی و تەنانەت بلندبوونا دەنگێ دلێر و ئازا ل دھۆکێ وەکو ھێلەکا سۆر ژ لایێ دەستھەلاتێ ڤە دھێتە تەماشەکرن، ژبەر کو ب تنێ بەرپرسێن ڤێ دەڤەرێ ژ خولقاندنا رەوشەکا ب ڤی رەنگی مفادارن.
ب درێژاھیا دیرۆکێ، دەھان سیاسەتمەدار و رۆناکبیر و نڤیسەر و رۆژنامەڤان و چالاکڤان ل دھۆکێ ھاتنە تیرۆرکرن و گرتن، ئەشەکەنجەدان، بێ سەروشوینکرن ،ھەمی پێنگاڤ بۆ بێ دەنگکرن و تەپەسەرکرنا دەنگێن نەرازی ھاتنە ئاڤێتن، لێ وێرەکی و خۆراگریا کەسایەتیێن نەرازیە کو ھەتا نوکە دەنگێن نەرازی زەلالتر و سەرێ ئازادیخوازان بلندترە.
بەری سەرھلدانێ و پشتی سەرھلدانێ ژی گەلەك کەسێن بەرناس قوربانی ژ پێخەمەت ئازادیان دانە، وزێدەباری وان زولم و ستەم و گڤاشتنێن ل ئازادیخوازێن دھۆکێ دھێتە کرن، لێ هەمی کۆمەکا کەسێن دیێن دلێر و ئازا دھێنە گۆرەپانێ و ب سنگەکێ بەرفرەھ بەرهەڤن سینگێ خۆ بکەنە چەپەر ل ھەمبەری گولـلەیێن نەحەزان!خەیالێن دەستھەلاتێ خاڤن!دەنگێ نەرازی ل دھۆکێ ناھێت بێ دەنگکرن. کوت و بەندکرنا پێنگاڤێن مەدەنی و ئازادیخوازان ل دھۆکێ ھەولەکا شکەستن خواریە و خەلکێ دھۆکێ گەلەک ژ ھندێ مەرد تر و مێرترن کو ل ھەمبەر زۆلم و ستەما ل وان دھێتە کرن، بێ دەنگ و بێ ھەلویست بن.
قوربانیدانا چالاکڤان و ئازادیخوازێن دھۆکێ ب ھەدەرنەچوویە و ناچیت، بەلکو رێکا خەبات و تێکوشانێ رۆناھیتر کریە و ھەول و بزاڤێن وان ب پیتێن زێرین دێ ھێنە تۆمارکرن.