سەرنووچە:

بۆریا ڤەگوهاستنا پەتڕۆلا هەرێمێ بۆ تورکیا تەقیە

AM:08:46:19/01/2022

692 جار خوێندراوەتەوە

+ -

شەڤا دەربازبووی بۆریەکا پەتڕۆلێ ل تورکیا تەقیا، پشتی چەند دەمژمێران دەرکەفت کو بۆریا ڤەگوهاستنا پەتڕۆلا هەرێمێ بۆ تورکیا بوو.

ئاژانسا نووچەیا ئەنادۆل ڕاگەهاند، تەقینەک ل بۆریا ڤەگۆهاستنا پەتڕۆلێ ل پارێزگەها مەڕەش یا باشورێ رۆژهەلاتێ تورکیا روویدا.

ئەو بۆریا تەقیایی بۆریا ڤەگوهاستنا پەتڕۆلا هەرێمێ بۆ تورکیا بوو، کو درێژیا بۆریێ ٥١١ کیلۆمەتر بوو.

بەحسا وێ یەکێ ژی هاتیە کرن، پشتی بەربوونا ئاگری هژمارەیەکا زێدە یا تیمێن ئاگرڤەمراندنێ و ئامبولانس رەوانەی وێ دەڤەرێ هاتنە کرن و رێیا هاتن و چوونێ دناڤبەرا مەڕەش و عەنتاب هاتە دائێخستن.

ژ ئالیێ خۆڤە پارێزگارێ مەڕەش دبێژیت، بسەدەمێ ئاگربەربوونێ هەیا نها چ زیانێن گیانی نەبوون، دبێژیت ژی، "هەیا نها سەدەمێن تەقینێ ناهێنە زانین".

د ڕاگەهاندنا کۆمپانیا بۆریان و ڤەگوهساتنا پەتڕۆلێ (بۆتاش) ئاماژە ب وێ یەکێ کریە، وان رێتنا پەتڕۆلێ راوەستاندیە و بزاڤ بۆ ڤەمراندنا ئاگری بەردەوامن.

ل داویا سالا ٢٠٢٠، بۆ دەمێ نێزیکی ١٠ رۆژان هنارتنا پەتڕۆلا هەرێمێ بۆ تورکیا هاتە راگرتن پشتی تەقاندنا بۆریێ، کو د وی دەمیدا حکومەتا هەرێمێ پەکەکە ب تەقاندنا بۆریێ تۆهمەتبارکربوو.

ل سالا ٢٠١٣ێدا، نێچیرڤان بارزانی سەرۆکێ وی دەمی یێ حکومەتا هەرێمێ گرێبەستەکا ٥٠ سالی دەربارەی پەتڕۆلا هەرمێێ دگەل تورکیا ئیمزاکر، لێ هەیا نها هویرکاریێن گرێبەستێ روهن نینن، هەیا نها ژی هویرکاریێن وێ نەهاتینە ئەشکەراکرن.

گەلەری