PM:08:07:28/03/2024
712 جار خوێندراوەتەوە
+
-
ژێدەرەکی ژ وەزارەتا داراییا حکومەتا رێڤەبرنا کارێن هەرێمێ بۆ ئین ئاڕ تی
راگەهاند، لیستا مووچەی بەری بهێتە بەلاڤکرن هاتیە دەستکاری کرن ب سەدەما
نەڕازیبوونا سەرۆکێ حکومەتا رێڤەبرنا کاران ب لیستێ.
ئەڤڕۆ پێنجشەمبی، ژێدەرەکی ژ وەزارەتا داراییا حکومەتا ڕێڤەبرنا
کاران بۆ ئێن ئاڕ تی راگەهاند، ب سەدەما ڕازی نەبوونا سەرۆکێ حکومەتا رێڤەبرنا کاران
ب لیستێ، بەری لیست بهێتە بەلاڤکرن گۆهڕین تێدا هاتینە کرن.
ئاماژە ب وێیەکێ ژیکر، ناڤێ چەندین وەزارەت و رێڤەبریان تێدا هاتیە لادان
کو ژ وانا ژی هێزێن ئەولەهیێ و سەرۆکاتیێن هەرێمێ نە، ژبەرکو مەسرور بارزانی
سەرۆکێ حکومەتا رێڤەبرنا تا نها ئیمزا لسەر مەزاختنا داهاتی ناڤخۆ نەکریە.
بەحسا وێیەکێ ژیکر، ئەو مووچەیێ ژ رۆژا شەمبیێ دهێتە دابەشکرن، دێ ژ وان
٦١٢ ملیار دیناران هێتە دابەشکرن کو ئەڤڕۆ ژ لقا بەنکا ناڤەندی هاتیە ڤەگوهاستن.
گوت ژی، مووچەیێ وان وەزارەتێن ناڤێن وان د لیسێ دا نەهاتی مووچەیێ وان
ناهێتە دابەشکرن تا پارە ژ بەغدا نەهێت و سەرۆکێ حکومەتا رێڤەبرنا کاران سوورە
لسەر نەمەزاختنا پارەیێ داهاتێ ناڤخۆ بۆ مووچەی.
پشتی زێدەتری دوو حەفتیان ژ دەستبسەرداگرتنا پارەیێ
بەغدا ژ لایێ حکومەتا رێڤەبرنا کاران، وەزارەتا داراییا حکوماتا رێڤەبرنا کارێن هەرێمێ
لیستا مووچەیێ مەها دوو بەلاڤکر، لێ ناڤێن چەندین وەزارەت و رێڤەبەریا تێدا نەبوو.
دیوانا وەزارەتا پێشمەرگەی و لیوایان، یەکەی ٧٠ و ٨٠، رێڤەبەریا دامودەزگەهێن
پەترۆلێ، رێڤەبەریا گشتی یا بارێ شارستانی، هێزێن زێرەڤانی و فەرماندەیا
فریاکەفتنێ، جڤاتا ئاسایشێ، سەرۆکاتیا هەرێمێ و سەرۆکایەتیا پەرلەمانێ و سەرۆکێ
جڤاتا وەزیران، ناڤێن وان د لیستا مووچەی دا نینە.