پارێزگاری سلێمانی رایگەیاند، بەتوندی ئیدانەی هەر توندوتیژییەک دەکەن و بە فەرمی فەرمان بە کەس نەکراوە بۆ بەکارهێنانی توندوتیژیی.
هەڤاڵ ئەبوبەکر پارێزگاری سلێمانی لە راگەیەنراوێکدا دەڵێت، "ئێمە وەک پارێزگای سلێمانی بەتوندی ئیدانەی هەر توندوتیژییەک دەکەین و لایەنە پەیوەندیدارەکان راسپێردراون بە لێکۆڵینەوە و دۆزینەی ئەو کەسانەی بەدەر لەهەر بنەمایەکی مافەکانی مرۆڤ و دوور لە هەر بڕیار و راسپاردن و دیسپلینێکی سەربازیی روبەڕوی خۆپیشاندەر و هاوڵاتیانی مەدەنی بونەتەوە."
ئاماژەی
بەوەشکردووە، "هیچ کەسێک، هیچ فەرمانێکی فەرمی و دەوڵەتی، رێکخراو یان ناڕێکخراوی
پێنەکراوە بە بەکارهێنانی هیچ جۆرە توندوتیژییەک و هەر حاڵەتێکیش روویداوە بکەرەکانی
وەک کەس لێی بەرپرسیارن."
باسی
لەوەشکردووە، "پارێزگاری سلێمانی هیچ هێزێکی تایبەتی و دیاریکراو بەخۆی نییە و
پارێزگای سلێمانیش دامەزراوەیەکی تەواو مەدەنییە."
هەڤاڵ ئەبوبەکر راشیگەیاندووە، "پاراستنی ئارامی
و سەقامگیریی ئەرکی هەموومانە و پارێزەری هەر چالاکی و رێگایەکی مەدەنیانە دەبین کە
بە ئاشتیانە گوزارشت لە داخوازییەکان بکات."
ماوەى سێ رۆژە
خوێندکارانى زانکۆ و پەیمانگاکان بۆ داواکردنى پێدانى دەرماڵە گردبوونەوە و خۆپیشاندان
ئەنجام دەدەن و دوێنێ بۆ بڵاوەپێکردنى خوێندکاران هێزە ئەمنییەکان دارى کارەبایى و
گازى فرمێسکڕێژیان بەکارهێنا و بەو هۆیەوە چەند خوێندکارێک بریندار بوون.
ئەمڕۆش، هێزە ئەمنییەکان
نەک تەنها گازی فرمێسک رێژ، بەڵکو تەقەیان بەسەر خوێندکارانیشدا کرد لە سلێمانی و
لە دهۆکیش بە زەبری هێز بڵاوە بە خۆپیشاندەران کرا.
هەر ئەمڕۆش، لە
هەریەکە لە زانکۆکانی، سلێمانی، پۆلیتەکنیکی سلێمانی، هەڵەبجە و راپەڕین دەوامی خوێندکاران
بۆ ماوەی دوو رۆژ راگیرا و بەشە ناوخۆییەکان داخران.