سەرۆکی فراکسیۆنی نەوەی نوێ لە کۆنفرانسێکی رۆژنامەنووسیدا رایگەیاند، هەڵبژاردنە چاوەڕوانکراوەکەی هەرێم گۆڕانکاری گەورە دروست دەکات، دەشڵێت، "جگە لە ئێمە سەرجەم فراکسیۆنەکان کۆکبوون پەرلەمان بێ باسی هەڵبژاردن و کۆمسیۆن کۆببێتەوە."
کاوە عەبدولقادر سەرۆکی فراکسیۆنی نەوەی نوێ لە پەرلەمانی کوردستان رایگەیاند، دەبێت کۆبونەوەی لایەنەکان و پەرلەمان لەسەر کێشەکانی خەڵک بێت.
باسی لەوەشکرد، لەژێر هیچ بیانویەکدا نابێت هەڵبژاردنەکان دوابخرێت و پێویستە
هەڵبژاردنەکان لە کاتی خۆیدا بکرێت.
ئەوەش لە کاتێکدایە، بڕیارە سبەینێ پێنجشەممە، کەسایەتی یەکەمی هەر شەش حزبەکەی هەرێم لەگەڵ جێنین پلاسخارت نوێنەری گشتی نەتەوە یەکگرتووەکان لە هەرێم کۆببنەوە و باس لە پرسی هەڵبژاردنەکانی هەرێم بکرێت.
بڕیارە لە مانگی تشرینی یەکەمی ئەمساڵدا هەڵبژاردنی پەرلەمانی کوردستان لە هەرێم بەڕێوەبچێت، بەڵام بەهۆی ناکۆکی سیاسی نێوان حزبە دەسەڵاتدارەکانی هەرێم تاوەکو ئێستاش کۆمسیۆن کارانەکراوەتەوە.