لە وڵاتی چین تەکنەلۆژیای ڕۆبۆتە مرۆییەکان گەشەسەندنێکی خێرا بەخۆوە بینیوە.

بەپێی هەواڵێکی ماڵپەڕی "eremnews"، ئاماژە بەوە کراوە کە ڕەنگە تێگەیشتنە باوەکانی ئێمە بۆ توانای جەستەیی بگۆڕێت، ڕاپۆرتە نوێیەکان باس لەوە دەکەن کە بەم زووانە ئەم ڕۆبۆتانە دەتوانن لە پێشبڕکێکانی ڕاکردنی خێرا، بەتایبەت ڕاکردنی ۱۰۰ مەتری، لە مرۆڤەکان خێراتر بن، ئەو بوارەی کە چەندین دەیەیە تەنها تایبەت بووە بە توانای مرۆیی.

بە وتەی شارەزایان، هەندێک لە نموونە تاقیکارییەکانی ئێستا دەستیان کردووە بە تۆمارکردنی خێراییەکی سەرنجڕاکێش. یەکێک لە ڕۆبۆتە تاقیکارییەکان توانیویەتی خێراییەکەی بگەیەنێتە نزیکەی ۱۰ مەتر لە چرکەیەکدا، ئەمەش وای لێدەکات زۆر نزیک بێتەوە لە ئاستی ڕاکەرە پیشەگەرەکان.

پێشبینییەکان ئاماژە بەوە دەکەن کە لە چەند ساڵی داهاتوودا، ئەم ڕۆبۆتانە دەتوانن مەودای ۱۰۰ مەتر لە کەمتر لە ۱۰ چرکەدا ببڕن، ئەمەش بەواتای شکاندنی ژمارەی پێوانەیی جیهانی دەبێت کە بەناوی مرۆڤەوە تۆمارکراوە.

ئەم ڕۆبۆتانە پشت بە تەکنەلۆژیای پێشکەوتووی ژیری دەستکرد و دیزاینی میکانیکی زۆر ورد دەبەستن، کە ڕێگەیان پێدەدات هاوسەنگی خۆیان بپارێزن و لە کاتی خێرایی زۆردا کۆنترۆڵی جوڵەکانیان بکەن.

بە پێچەوانەی مرۆڤەوە، ڕۆبۆتەکان تووشی ماندوێتی یان لەدەستدانی سەرنج نابن، ئەمەش لە پێشبڕکێ کورتەکاندا دەبێتە سوودێکی گەورە بۆیان.

هەروەها سیستەمە نوێیەکانی کۆنترۆڵ ڕێگەیان پێدەدات لە ڕێگەی داتا و تاقیکردنەوەکانەوە بەردەوام ئاستی خۆیان باشتر بکەن، ئەمەش گەشەسەندنی ئەوان خێراتر دەکات بەراورد بە توانای مرۆڤ کە لە ڕووی بایۆلۆژییەوە سنووردارە.

ئەگەر ئەم پێشبینییانە بێنە دی، ڕەنگە لە داهاتوویەکی نزیکدا بینەری پێشبڕکێیەکی وەرزشی نائاسایی بین کە مرۆڤ و ڕۆبۆت تێیدا پێکەوە ڕکابەری بکەن، ئەمەش دەرگای پرسیاری نوێ دەکاتەوە سەبارەت بە سنوورەکانی مرۆڤ و ڕۆڵی تەکنەلۆژیا لە دووبارە پێناسەکردنەوەی ئەو سنوورانەدا.