ئیلهام ئەحمەد سیاسەتمەداری دیاری رۆژئاوای کوردستان دەڵێت، سەرجەم هەنگاوەکانی ناوچەکانی باکوور و رۆژهەڵاتی سوریا بە رێککەوتنی هاوبەش لەگەڵ دیمەشق ئەنجامدەدرێن، هاوکات جەختی لە چەسپاندنی مافەکانی کورد لە دەستوری نوێ و چوونی هێزەکانی هەسەدە بۆ ناو سوپای سوریا کردەوە.
ئەمڕۆ سێشەممە ٨ـی ئەیلولی ٢٠٢٦، ئیلهام ئەحمەد سیاسەتمەداری دیاری رۆژئاوای کوردستان ئاشکرایکرد، هەنگاوە نوێیەکەیانیان لەسەر بنەمای چەسپاندنی مافە دەستوری و کلتورییەکانی کورد لە دەستوری نوێی سوریادا بونیادنراوە، بە جۆرێک کە زمانی کوردی ببێتە زمانی فەرمیی خوێندن لە قوتابخانەکاندا، هاوکات تێکەڵکردنی هێزە سەربازی و ئەمنییەکانیش لەگەڵ سوپای سوریا لەخۆدەگرێت.
دەشڵێت،
دۆسیەی کورد گواستراوەتەوە بۆ قۆناغێکی نوێی سیاسی و لە قۆناغی داهاتووشدا
چەسپاندنی مافەکانی کورد لە دەستووری نوێی سوریادا دەبێتە پێشینەی کارەکانیان،
بەجۆرێک کە سەرجەم مافە زمانی و کلتورییەکان زامن ببن و زمانی کوردی ببێتە زمانی
فەرمیی خوێندن لە قوتابخانەکاندا.
سەبارەت
بە دۆسیەی ئەمنی و سەربازی، ئاماژەی بەوە کرد، پێشکەوتنی بەرچاو بەدیهاتووە لە
پرۆسەی پەیوەندیکردنی هێزەکانی سوریای دیموکرات بە سوپای سوریاوە بەشێوەی گروپ، جەختیشی
کردەوە، پڕۆسەی تۆمارکردنی ئەندامانی ئاسایش و تێکەڵکردنی دامەزراوەکانی ئیدارەی
خۆبەڕێوەبەری لە دەزگا دەوڵەتییەکانی سوریادا بە بەردەوامی بەڕێوەدەچێت.
ئەو
سیاسەتمەدارە کوردە جەختیشی لەوە کردەوە کە سەرجەم ئەو هەنگاوانەی لە ناوچەکانی
باکوور و ڕۆژهەڵاتی سوریا جێبەجێ دەکرێن، لەسەر بنەمای ڕێککەوتنی ٢٩ـی کانوونی
دووەم و بە دانوستان و رێککەوتنی هاوبەش لەگەڵ دیمەشق ئەنجام دەدرێن.
روونیشی
کردەوە، هیچ هەنگاوێکی تاکلایەنە لەلایەن هیچ لایەکەوە نانرێت تاوەکو سەقامگیریی
لە ناوچەکە و ئاگربەستی هەمیشەیی بە تەواوی مسۆگەر بێت.