PM:02:35:02/09/2026
952 جار خوێندراوەتەوە
دوای ئەوەی ئێن ئاڕ تی هەواڵی بێسەروشوێن بوونی زیاتر لە ٣٠ گەنجی کوردی بڵاوکردەوە، وەزارەتی ناوخۆی هەرێم رایگەیاند، ڕێکارە یاسایی و کارگێڕییەکانی گەڕانەوەی ٣٣ گەنجی دیکەی کورد لە وڵاتی لیبیاوە کۆتاییان هاتووە و بڕیارە هەفتەی داهاتوو بگەنەوە هەرێم.
ئەمڕۆ چوارشەممە ٢ـی ئەیلوولی ٢٠٢٦، لە ڕاگەیەندراوێکدا وەزارەتی ناوخۆی هەرێم ڕایگەیاند، دوای بڵاوبوونەوەی هەواڵی بێسەروشوێنبوونی ژمارەیەک هاونیشتمانی لە وڵاتی لیبیا، هەردوو وەزارەتی ناوخۆ و فەرمانگەی پەیوەندییەکانی دەرەوە راسپێردران بۆ دۆزینەوە، ڕزگارکردن و گەڕاندنەوەی ئەو کۆچبەرانە.
ئاماژە
بەوەشکراوە، لە ئێستادا تەواوی مامەڵەکانی ئەو ٣٣ هاوڵاتییە تەواو بووە و
ئامادەکارییەکان بۆ گەڕانەوەیان لە هەفتەی ئایندەدا بەردەوامە.
ئەوەش
خراوەتەڕوو، ئەم گەنجانە کە بە ڕێگەی نایاسایی کۆچیان کردبوو، ڕووبەڕووی
بارودۆخێکی یەکجار سەخت بوونەتەوە و هەندێکیان بۆ ماوەی هەشت مانگ لە زیندانەکانی
لیبیادا دەستبەسەر بوون، کە تێیدا لەژێر مەترسیی بەردەوامی مردندا بوون.
بە گوێرەی
راگەیەندراوەکە، تاوەکو ئەمڕۆ ٣٠٢ کۆچبەری نایاسایی لە بارودۆخە جیاوازەکاندا رزگار
کراون و گەڕێندراونەتەوە هەرێم.
