رێکارەکانی خۆپاراستن لەکاتی دروستبوونی لافاو:

١- لافاو خێرا زیاد دەکات چاوەڕێ مەکە تا ئاو بەرز دەبێتەوە، دەستبەجێ لە ناوچە نزمەکان دووربکەونەوە، لەو شەقامانەدا لافاویان تێدا دروست بووە شۆفێری مەکە و هەوڵبدە ئەو ناوچانە بگریتەبەر کە ئاراستەی رێگاکانیان لە لافاو پارێزراوە.

٢- پارەی نەختینە و دەرمان و پێداویستی فریاگوزاری سەرەتایی و جل و بەرگ پۆشاکی پێویست لەگەڵ بەڵگەنامە گرنگەکان بە پارێزراوی بهیڵەوە و ئەو شوێنانە دیاریبکە کە دەتەوێت لە ئەگەری لافاودا بۆی بڕۆیت.

٣- هەوڵبدرێت کەسێکی پەیوەندیدار دیاری بکرێت کە ئەگەر ئەندامانی خێزانەکەت جیابوونەوە، بتواندرێت پەیوەندی پێوە بکرێت بۆ هاوکاری کردنیان.

٤- ماددە مەترسیدارەکان (وەک بۆیاخ، رۆن، قڕکەر و پێداویستی پاککردنەوە) دوور بخەرەوە لە شوێنە نزمەکان لە ماڵەکەتدا یان بیانگوازەرەوە بۆ شوێنی بەرزتر.

٥- دەرچەی هەواگۆڕکێ بۆ ژێرزەمینەکان دابخە بۆ رێگریکردن لە لافاو و کۆبوونەوەی ئاو لە ماڵەکەتدا وە دوور بکەوەرەوە لەو شوێنانەی کە پێشتر لافاویان لێ دروستبووە و هەوڵ مەدەن بەو شوێنانەدا تێ پەڕبن.

٦- دوور بکەوە لە هێڵەکانی کارەبا و وایەری کارەبا و کێبڵە بارگاوییەکان و دەستبەجێ شوێنەکە چۆڵ بکە، هاوکات بۆ گیرخواردوان و رزگارکردنیان کەرەستەی گونجاو بەکاربێنن ئەگەر توانرا شتێک فڕێ بدەن بۆ کەسەکە کە یارمەتی بدات لە دەستپێگەیشتن و سەلامەتی، وەک تایەی یەدەگ، یان پەتێکی بەهێز.

٧- لەکاتی پێشبینی روودانی لافاودا چاودێری هەواڵەکان بکە تا خێراتر ئاگاداری گۆڕانکارییەکانی بڵاوبوونەوەی لافاو بیت لە ناوچەکەتدا و لە پێناو سەلامەتیت تەواوی یەکە کارەباییەکانی ناو ماڵەکات بکوژینەوە.

٨- لە کاتێکدا پێشبینی ئەگەری لافاو دەکرێت پێویستە خۆت لە ناوچە نزمەکان بەدوور بگریت و ئەگەر تەڕ بوویت یان لەناو ئاودا وەستابوویت دەست لە هیچ کەرەستەیەکی بارگاوی و کارەبای مەدە و تەواوی یەکە بارگاوییەکانی ماڵەکەت بکوژێنەوە.

٩- هاوڵاتیان پێویستە لە ئەگەری دروستبوونی لافاودا بە خێرایی پەیوەندی بکەن بە ژمارە (١١٥_١٢٥) ـی ژووری فراگوزارییەوە تاوەکو بە زووترین کات بتواندرێت تیمەکانی بەرگری شارستانی بگەیەندرێتە ناوچەکە.