نوسینگەی راگەیاندنی سەرۆک وەزیرانی عێراق بڵاوی کردەوە، بە بڕیاری سەرۆک وەزیران، حەوت لیژنە بە مەبەستی بەدواداچوون بۆ رێککەوتنەکانی نێوان عێراق و تورکیا پێکهێنراون.
بە گوێرەی راگەیەنراوێکی نوسینگەی سودانی، پێکهێنانى ئەو حەوت لیژنەیە بە مەبەستی بەدواداچوونە بۆ ئەو رێککەوتنانەی لە کاتی سەردانەکەی ئەردۆغان بۆ عێراق، لە نێوان تورکیا و عێراقدا واژۆ کراون، کە دۆسیەکانی ئاو و وزە و ئابووری و ئاسایشن.
ئاماژە بەوەش کراوە، سودانى داواى لە وەزارەتەکانى کشتوکاڵ و سەرچاوەکانى
ئاو و ئاوەدانکردنەوە کردووە، پڕۆژە پێویستەکانى کەرتى ئاو پێشکەش بکەن، بەتایبەت
ئەو پڕۆژانەی پەیوەندیدارن بە بەنداوەکان و رووبارەکان.
هاوکات، سودانی فەرمانى بە سەرجەم ئەو وەزارەتانەش کردووە، کە یاداشتى لێکتێگەیشتنیان
لەگەڵ شاندى تورکیا واژۆ کردووە، لە ماوەى دوو هەفتەدا پلان و خشتەى کارى هەریەک لەو
یاداشتانە ئامادە بکەن، تا تاوتوێ بکرێن و بەدواداچوونیان بۆ بکرێت.
ئەوەش لەکاتێکدایە، ٢٢ـی مانگی رابردوو، سەرۆک
کۆماری تورکیا سەردانی عێراقی کرد و پاش کۆبوونەوەی لەگەڵ محەمەد شیاع سودانی
سەرۆک وەزیران، چەندین یاداشتنامەی لێکتێگەیشتن لە بوارە جیاجیاکاندا لەنێوان
هەردوو وڵات واژۆ کران.