بەڵگەکان ئەوە دەردەخەن، بەرزبوونەوەی زۆری شەکری خوێن، بە تێپەڕبوونی کات، دەبێتە هۆی هەوکردن و زیادکردنی ئەگەری تووشبوون بە نەخۆشییەکان، وەک نەخۆشییەکانی دڵ و شەکرەی جۆری دوو، وا لە مرۆڤ دەکات بە خێرایی هەست بە برسێتی بکاتەوە، هەر لەبەر ئەوەشە هەندێک کەس خواردنی نان وەک ئالوودەبوونێک دەبینن.

بریجیت بینێلام، پسپۆری خۆراکی دەڵێت، "بە بەراورد لەگەڵ خۆراکە نیشاستەییەکانی دیکەی وەک مەعکەرۆنی، برنج یان پەتاتە، نان رێژەی ئاوی کەمتری تێدایە و بەوهۆیەوە رێژەی کاربۆهیدراتەکەی زیاترە".

بۆ نموونە، نانی سپی نزیکەی ٤٨ گرام کاربۆهیدراتی تێدایە لە هەر ١٠٠گرامێکدا، لە کاتێکدا مەعکەرۆنی ٣٧ گرامی تێدایە، برنج ٢٧ گرام و پەتاتەی کوڵاو نزیکەی ١٧ گرام کاربۆهیدراتی تێدایە.

لای خۆیەوە دکتۆر سەلحە ئەحمەد، پزیشکی گەدە و ریخۆڵە ئاماژەی بەوە کردووە، "بەرزبوونەوەی شەکری خوێن دوای خواردن ئاساییە و بە گشتی کێشە دروست ناکات بۆ کەسانی تەندروست کە نەخۆشی شەکرەیان نییە."

باسی لەوەش کردووە، بەرزبوونەوەی شەکری خوێن بە رادەیەکی زۆر زیان بە تەندروستی دەگەیەنێت، بەڵام کاربۆهیدراتەکانی وەک نان پێویستە بۆ ئەوەی وزەی پێویست بۆ جەستە و مێشک دابین بکات بۆ ئەنجامدانی ئەرکەکانیان.

سەبارەت بە کاریگەری خواردنی نان لەسەر زیادبوونی کێش، شارەزای بواری خۆراک ڤانێسا کیمبۆڵ دەڵێت، "پەیوەستە بە چۆنیەتی دروستکردنی نانەکە و ئەو جۆرە دانەوێڵانەی کە تێیدایە، وەک نانی کەم ریشاڵ کە ئاستی ئەنسۆلین بەرزدەکاتەوە، ئەمەش دەبێتە هۆی زیادبوونی کێش".

لە لایەکی ترەوە دانەوێڵەی تەواو یان ئەوانەی بڕێکی زۆر ریشاڵی تێدایە، خواردنیان بە بڕێکی کەم وادەکات بە زوویی هەست بە تێربوون بکەیت.