نوسینگەی سەرۆک وەزیرانی عێراق رایگەیاند، سەرۆک وەزیرانی عێراق بۆ تاوتوێکردنی هاوکارییەکانی بانکی نێودەوڵەتی لە گەشەپێدانی ئابووری و سندوقی بانکی ناوەندی لەگەڵ بەڕێوەبەری بانکەکە کۆبووەوە. دەشڵێت " هەموو رێگایەک بۆ چاکسازی لە سیستمی بانکیدا دەگرینە بەر".
ئەمڕۆ پینجشەممە، نوسینگەی سەرۆک وەزیرانی عێراق راگەیەندراوێکی بڵاوکردەوە و تێیدا هاتووە، محەمەد شیاع سودانی سەرۆک وەزیرانی عێراق لە میانەی بەشداریکردنی لە فۆڕمی ئابووری بەمەبەستی تاوتوێکردنی سیستمی دارایی و بانکییەکانی عێراق لەگەڵ کریستالینا جۆرجییڤا بەڕێوەبەری نەختینەی بانکی نێودەوڵەتی کۆبووەوە.
ئاماژەی بەوەش کرد، لە میانەی کۆبوونەوەکەدا بۆ چاکسازیکردن لە سیستمی
بانکی و دارایی عێراق تاوتوێی پلان و هاوکارییەکانی بانکی نێودەوڵەتی کراوە. دەشڵێت،"
ئامادەین بۆ هەرجۆرە چاکسازییەک کە سیستمە بانکییەکانمان پێشبخات".
لای خۆشییەوە، کریستالینا جۆرجییڤا سەرۆکی نەختینەی بانکی نێودەوڵەتی
جەختی لە هاوکاریی و هەماهەنگییەکانی بانکەکە بۆ پەرەپێدان و رێکخستنی سیستمی بانکی
عێراق کردەوە.
هاوکات، شارەزایەکی ئابووری بە ئێن ئاڕ تی وت، بانکی نێودەوڵەتی
هاوکاردەبێت لە بەرزبوونەوەی ئاستی داهاتی نانەوتی و فراوانبوونی ئاستی مامەڵە
داراییەکان بە کارتی ئەلیکترۆنی. دەشڵێت " دەبێتە هۆی گەڕاندنەوەی متمانە بۆ
بانکەکانی عێراق لە جیهان و ناوخۆشدا کە پێشبینی دەکرێت بەرێژەی ٢٠٪ کاریگەرییەکانی
لە دوای گەرانەوەی سودانییەوە دەستپێبکات".
سەبارەت بە نرخی دۆلاریش باسی لەوەکرد، بانکی نێودەوڵەتی رێکخەرێکی
گرنگ دەبێت بۆ عێراق لە رووی کۆنترۆڵکردنی نرخی دۆلار و بەرزکردنەوەی بەهای دینارەوە،
چونکە راستەوخۆ بەهای دینار دەگوازرێتەوە بۆ بازاڕەکانی جیهان و بەوەش خواستی هاوڵاتیان
بۆ دینار بەرزتردەبێتەوە.