بەشێک لەشرۆڤەکارانی سیاسی لەو باوەڕەدان هەژموون و زاڵبوونی ئەردۆغان بەسەر سیاسەت و حکومەت و سیستەمی دادوەری تورکیا لەماوەی سەد ساڵی رابردووی وڵاتەکەدا بێوێنە بووە.

لەم هەڵبژاردنەدا، قەیرانی ئابوری و زیادبوونی سەرکوتکردنی مافەکانی مرۆڤ و لاوازبوونی رۆڵ و پێگەی یاساو سیستەمی دادوەری لەو ساڵانەی دواییدا گۆڕەپانەکەیان بۆ رەجەب تەیب ئەردۆغان بەرتەسک کردوەتەوەو لەدیارترین ئەو ئاڵنگاریانەن رووبەڕووی بوونەتەوە.

یەکێکی دیکە لەو ئاڵنگارییانەی رووبەڕووی ئەردۆغان دەبێتەوە دەنگە مۆلەق "سوینگ"ەکانن، ئەوانەی هێشتا خۆیان یەکلایی نەکردووەتەوە کە دەنگ بەکێ دەدەن کە ٢٠٪ دەنگدەران پێکدەهێنن، سەرەڕای شەش ملیۆن دەنگدەری نوێ کە بۆ یەکەمجارە بەشداری هەڵبژاردنەکان دەکەن و دەنگ دەدەن.

لەبەرامبەردا، کەمال کڵیچدار ئۆغلوی تەمەن ٧٤ ساڵ و کاندیدی هاوپەیمانی میلەت و بەهێزترین رکابەری رەجەب تەیب ئەردۆغان، بەگوێرەی زۆربەی راپرسییەکان لە پێش ئەردۆغانەوەیە، لەماوەی رابردوودا رایگەیاند، دڵنیایە لەهەڵبژاردنەکاندا شکست بە حکومەتەکەی ئەردۆغان دەهێنێت.

پرسی کورد، یەکێک لەسەخترین و دیارترین پەسەکانی سەر گۆڕەپانی سیاسی تورکیا، ئەردۆغان و ئۆپۆزسیۆن چاویان لەسەر دەنگی کوردە، هەربۆیە بەشێک لە شرۆڤەکارانی سیاسی و چاودێران لەو باوەڕدان چارەنووسی تورکیا ئەو کەسە دیاریدەکات کە بتوانێت پرسی کورد چارەسەر بکات.