نوێنەری عەلی خامنەیی رابەری باڵای ئێران رایگەیاند، ئێران و سعودیە لە گفتوگۆکانیان بۆ دەستپێکردنەوەی گەشتەکانی عەمرە بەردەوامن.
عەبدولفەتاح نەواب نوێنەری عەلی خامنەیی رابەری باڵای ئێران وتی، دەستپێکردنەوەی گەشتەکانی عەمرە پێویستی بە گفتوگۆ و تاوتوێکردن هەیە لە نێوان دەسەڵاتی ئێران و سعودیە.
ئاماژەی بەوەشکردووە، بەرپرسانی ئەو دوو وڵاتە بەوپەڕی خۆشحاڵییەوە چاوەڕێی
ئەنجامدانی گەشتەکانی عەمرەن.
باسی لەوەشکرد، پێویستە لە نێوان هەردوو وڵاتدا کونسوڵخانەکان بکرێنەوە و
چالاک بکرێن پێش ئەوەی وەرزی حەج دەسپێبکات.
پێشتریش، لە رۆژی ١٢ی ٤ی ٢٠٢٣ کەناڵی
تەلەفیزیۆنی فەرمی ئێران بڵاویکردەوە، ئیحسان خاندوزی وەزیری ئابوری و دارایی ئەو
وڵاتە لە کۆنفرانسێکی رۆژنامەنووسیدا رایگەیاند، سعودیە و وڵاتەکەی لە گفتوگۆدان بۆ
دامەزراندنی ژوورێکی بازرگانی هاوبەشی ریاز-تاران بە ئامانجی بەرەوپێشبردنی پەیوەندییە
ئابوورییەکانی نێوان هەردوو وڵات.
وتیشی، لە ئایندەیەکی نزیکدا رۆژمێری "کۆمیسیۆنی ئابووریی هاوبەش"ی
نێوان ئێران و سعودیە رادەگەیەنن و پلانی جۆراوجۆریشیان هەیە بۆ زیندووکردنەوە و گەشەپێدانی
پەیوەندییە ئابوورییەکانی نێوان هەردوو وڵات.
ئەمە لەکاتێکدایە، رۆژی هەینی رێکەوتی ١٠ی ٣ی ٢٠٢٣ شەمخانی سکرتێری ئەنجومەنی
باڵای ئاسایشی نیشتمانی ئێران و موسەید بن محەمەد ئەلعەیبان وەزیری دەرەوەی سعودیە
و فانگ یی ئەندامی مەکتەبی سیاسی کۆمیتەی ناوەندی حزبی شیوعی چین لە پەکینەوە راگەیاندراوێکی
هاوبەشیان لەبارەی رێککەوتنی سعودیە و ئێران بڵاوکردەوە.
بەپێی راگەیندراوەکە، ئەو دەستپێشخەرییە لەسەر داوای شی جین پینگ سەرۆکی
چین بووە و پاڵپشتی لێکنزیکبوونەوەی ئەو دوو وڵاتە و خواستی هەردوو وڵاتی لەسەر
چارەسەرکردنی کێشە و ناکۆکییەکان کردووە.
ئەمەش دوای ئەوەدێت سعودیه ٢ی كانوونی دووه‌می ٢٠١٦ به‌تۆمه‌تی تیرۆر ٤٧
كه‌سی له‌سێداره‌دا كه زانای ئایینی شیعه مه‌زهه‌بیان لە نێودا بوو و دوای ئه‌وه‌ش
به‌رپرسانی ئێران به دوای یه‌كدا كاردانه‌وه‌یان به‌رامبه‌ر سعودیه ده‌ربڕی،
دواتر ئاگر به‌ردرایه باڵیۆزخانه‌ی سعودیه له تاران و كۆنسوڵخانه‌ی سعودیه له
مه‌شهه‌د.
ئەو دوو وڵاتە لە ماوەی رابردووشدا چەندان جار لە عێراق کۆبوونەوە بە مەبەستی
رێککەوتن و ئاماژەیان بەوەدا نزیک بوونەتەوە لە رێککەوتن.