PM:12:51:08/12/2021
464 جار خوێندراوەتەوە
+
-
سیپان ئامێدی ڕاگەهاند، پشتی زێدەتری ٢٠
پێشمەرگە و وەلاتیێن سڤیل شەهیدبووین شنی پەرلەمانێ کوردستانێ روینشتنێ لسەر ڤێ
پرسێ ئەنجامددەت، دبێژیت ژی، " دەرخستنا بەیاننامەیان ڕەوشا چەپەران
ناگوهۆریت ".
سیپان ئامێدی پەرلەمانتارێ کوردستانێ ژ
فڕاکسیۆنا نەوەی نوێ د داخۆیانیەکێ دا بۆ ئێن ئاڕ تی دبێژیت، پرسا پێشمەرگەی پرسەکا
هەری گرنگە و پێشمەرگەی پێتڤی ب دەرخستنا بەیاننامەیان ژ ئالیێ سەرۆکایەتیا
پەرلەمان یان ژی سەرۆکایەتیا هەرێم و حکومەتێ نینە.
ئاماژە ب وێیەکێ ژی دکەت، "پشتی زێدەتری
٢٠ پێشمەرگە و وەلاتیێن سڤیل ل کوردستانێ شەهیدبووین شنی پەرلەمانی روینشتن لسەر
ڤێ پرسێ ئەنجامدا کا دێ چکەت یان چ ڕاسپاردەی ئالیێن پەیوەندیدار کەتن". دبیژیت
ژی، " دەربارەی پرسێن هەرێمێ پەرلەمانێ کوردستانێ بەردەوام د پاشڤەچوونێ
دایە".
بەحسا وێیەکێ ژی کر، "ب دەرخستنا
بەیاننامەیان چ تشت ژ ڕەوشا چەپەران ناهێتە گوهۆرین، پێشمەرگە پێتڤی ب پرچەککرنێ
یە، ئەو چەک و کەرەستەیێن سەربازی یێن هەڤەپەیمانان بۆ وەزارەتا پێشمەرگەی دابینکرین
کانێ نە؟، پتریا وان بۆ بەرپرسێن حزبی و هێزێن وان یێن تایبەتن نەکو ژبوی هێزێن
پێشمەرگەی نە کو ئەڤرۆ ل چەپەران بەرەڤانیێ ل ئاخ و کەرمەت و وەلاتی دکەن".
د بەشەکێ دی یێ گوتنێن خۆ دا سیپان ئامێدی
دبێژیت، گرنگە پێداچوون د سیستەمی گشتیێ هێزێن پێشەرگەی دا بیهنەکرن ژبوی بفەرمیکرنا
وان ل گۆرەی وێیەکێ کو ببنە هێزێن نشتیمانی داکو دوویربن ژ کێشمەکێشێن حزبی،
ژبەرکو دنهادا ب بڕیارێن حزبی لڤین ب هێزێن پێشمەرگەی دهێتەکرن".
ئەڤە د دەمەکێ دایە، ل ٢ی ڤێ مەهێ چەکدارێن
داعش هێرشکرنە سەر گوندێ خدرجیجە و د ئەنجامدا ١٣ پێشمەرگە و وەلاتی شەهیدبوون و چەند
کەس ژی برینداربوون.
هەڤدەم، ل ٢٧ی مەها دەربازبووی ژی، ل ناحیا کۆلەجۆ
ل گەرمیان داعش هێرشکرە سەر چەپەرێن پێشمەرگەی، دەما کو هەڤکاری بۆ وان چووی بۆمبەکا
چاندی پێ ڤە تەقیا و پێنج پێشمەرگە شەهیدبوون و چارێن دی ژی برینداربوون.
ل ٢٩ی مەها دەربازبووی ژی، ل سنورێ کفری ژ ئالیێ
چەکدارێن داعش هێرشی چەپەرێن پێشمەرگەی هاتە کرن و د ئەنجامدا دوو پێشمەرگەی شەهیدبوون
و سێیێن دی ژی برینداربوون.