سەردێڕ:

ڤیدیۆ.. پێکدادان لە نێوان ئێران و تاڵیباندا روویدا

PM:08:34:01/12/2021

13188 جار خوێندراوەتەوە

ئاژانسی هەواڵی تەنسیمی ئێرانی ئاشکرایکرد، پێکدادان لە نێوان پۆلیسی پاسەوانی ئێران و تاڵیباندا لەسەر سنوری ئەفغانستان – ئێران روویداوە.


بەگوێرەی ئاژانسی هەواڵی تەنسیمی ئێرانی، پێکدادانەکە لە ناوچەی شغالکی سەر بە ولایەتی نیرموز روویداوە و "بەهۆی هەڵەتێگەشتنەوە" بووە.

باسی لەوەشکردووە، کێشەکە بەهۆی بوونی دیوارەکانی سەرسنور بووە کە لە ساڵانی رابردوودا بە مەبەستی روبەڕوبوونەوەی قاچاخچێتی و تاقمە چەتەکانی سەرسنور ئێران دروستیکردووە.

ئاژانسەکە ئاماژەی بەوەشکردووە، ئەمڕۆ چەند جوتیارێکی ئێرانی دیوارەکانیان تێپەڕاندووە و چوونەتە ئەودیوی دیوارەکان کە هەر ناو خاکی ئێرانە و پەیوەندی بە خاکی ئەفغانستانەوە نییە، بەڵام سەربازانی تاڵیبان بە هەڵە تێگەشتوون و وەک هێرش بینیویانە و بەو هۆیەوە پێکدادانەکە دروستبووە.

تا ئێستا هیچ زانیارییەک لەبارەی بوونی کوژراو و بریندارەوە بڵاونەکراوەتەوە. 

لەوبارەیەوە، بەرپرسێکی سەربازی باڵای ئێران بە ئاژانسەکەی وتووە، شەڕ و پێکدادانەکان وەستاون و لە ئێستادا لەگەڵ حکومەتی تاڵیبان لە گفتوگۆدان.

راشیگەیاندووە، دەستبەسەرداگرتنی چەند خاڵێکی پشکنینی سنوری ئێران لەلایەن تاڵیبانەوە رەتدەکەنەوە، دەشڵێت، "تەواوی سنوری ئێران بەدەست پۆلیسی سنورەوەیە."














گەلەری