سەردێڕ:

نرخی نەوت زیاتر بەرزبووەوە

AM:08:48:11/04/2024

1112 جار خوێندراوەتەوە

بە گوێرەی بازاڕی پێنوێنی جیهانی نەوت، لە ئێستادا یەک بەرمیل نەوتی برێنت بە ٩٠ دۆلار و ٦١ سەنت مامەڵەی پێوە دەکرێت، بەراورد بە دوێنێ چوارشەممە، نرخەکەی بەرزبووەتەوە.


ئەمڕۆ پێنجشەممە، بەگوێرەی بازاڕی پێنوێنی جیهانی نرخی یەک بەرمیل نەوتی رۆژئاوای تێکساس بە ٨٦ دۆلار و ٣٢ سەنت مامەڵەی پێوە دەکرێت و هاوشێوەی نەوتی برێنت، بەراورد بە دوێنێ نرخەکەی بەرزبووەتەوە.
هۆکارەکانی بەرزبوونەوەی نرخی نەوت لە هەفتەی رووداوەکاندا؛

دوای ئەوەی گرژی و ئاڵۆزییەکانی رۆژهەڵاتی ناوەڕاست پەلیکێشا بەرەو ناوچەکانی سوریا، بازاڕەکانی جیهان ناسەقامگیری بەخۆیەوە بینی و نرخی یەک بەرمیل نەوتی برێنت بە ٩٠ دۆلار و ٧٥ سەنت مامەڵەی پێوە کرا. شارەزایانیش ئاماژەیان بەوە کرد، "نرخی نەوت نزیک دەبێتەوە لە ١٠٠ دۆلار". 

لەلایەکی تریشەوە ناوەندی کارگێڕی وزەی ئەمریکا رایگەیاند، لە مانگی کانوونی دووەمی ئەمساڵدا ئاستی وەبەرهێنانی نەوت بەهۆی دابەزینی پلەکانی گەرماوە، بەرێژەی ٦.٢٪ دابەزینی بەخۆیەوە بینیوە و شرۆڤەکارانی نەوتیش دەڵێن، ئەو دابەزینە دەبێتە هۆی بەرزبوونەوەی نرخی نەوت.

هۆکارێکی تری پاڵنەری مانەوەی نرخی نەوت لە بەرزیدا، دووبارە بە ئامانجگرتن و تەقاندنەوەی کەشتیە نەوتیەکان بوو لەلایەن گروپە چەکدارەکان و لەهەمان کاتیشدا هێرشەکانی ئۆکرانیا بۆسەر کەشتییە نەوتی و کێڵگە نەوتییەکانی روسیا یەکێکی تر بووە لە هۆکارەکان کە نرخی نەوتی بۆ سەروو ٨٩ دۆلار بەرز کردەوە.



 
 












گەلەری