ئاماژەی بەوەش کرد، لە ماوەی رابردوودا حکومەتی عێراق بە مەبەستی کەمکردنەوەی کورتهێنانی بودجە قەرزی لە چەند بانکێکی ناوخۆیی کردبوو و لە ئێستاشدا وەزارەتی گەنجینەی ئەمریکا رەزامەندە لەسەر ئەوەی کە عێراق قەرزی بانکە ناوخۆییەکان بە دۆلار بداتەوە. وتیشی، " هەریەک لە بانکەکانی رافیدەین، رەشید، ئیسلامی، بانکی کشتوکاڵی سوودمەند دەبن و راژەی متمانەی بانکییان بەرزتردەبێتەوە".

بانکە سزادراوەکان دەگەڕێنەوە بازاڕە ناوخۆییەکان؛

هاوکات، چاوگێک لە کۆبوونەوەی وەزارەتی گەنجینەی ئەمریکا لەبارەی بانکە سزادراوەکانەوە بە دیجیتاڵ میدیای ئێن ئاڕ تی راگەیاند، لەماوەی رابردوودا لەلایەن وەزارەتی گەنجینەی ئەمریکا و بانکی ناوەندیی عێراقەوە ٣٢ بانکی ناوخۆیی سزا دران و لەو رێژەیەش ١٠ بانک بە شێوەی رێژەیی سزاکان بەسەریاندا جێبەجێکرا.

باسی لەوەش کرد، لە قۆناغی یەکەمدا ئەو ١٠ بانکەی کە بەشێوەی رێژەیی سزا درابوون لە دوای کۆبوونەوەی نوێنەرایەتی بانکی ناوەندی و وەزارەتی گەنجینەی ئەمریکا لە رۆژی ٥ـی نیسان، بڕیاردرا بە لێخۆشبوونی سزاکانیان. وتیشی، "لەمەودوا ١٠ بانکە رێژەییەکە دەتوانن مامەڵەی ناوخۆییی بە دۆلاری کاشەوە بکەن لە ژێر سەرپەرشتی سیستمی بانکی نێودەوڵەتی و بانکی ناوەندیی عێراق".

چارەنوسی ٢٢ بانکەکەی دیکەی عێراق بە کوێ دەگات؟

ئەو چاوگە ئاماژەی بەوە کرد، هەریەک لەو ٢٢ بانکەی دیکەی عێراق کە بە رێژەی ١٠٠٪ سزا درابوون، رێککەوتن کراوە لە مانگی حوزەیرانەوە سزاکانیان بۆ رێژەیی کەم بکرێتەوە و ئەوەش متمانەی بانکە ناوخۆییەکان بەرزتر دەکاتەوە لەسەر ئاستی نێودەوڵەتی.

لەو بارەیەشەوە چاوگێک لە بانکی ناوەندیی عێراق بە دیجیتاڵ میدیای ئێن ئاڕ تی راگەیاند، لەگەڵ نوێنەرایەتی ٣٢ بانکە سزادراوەکە کۆبوونەتەوە و بە گوێرەی کۆبوونەوەکەش بڕیاردراوە کە لە چوارچێوەی سیستمی بانکی نێودەوڵەتی چاکسازیان تێدا بکرێت و لە قۆناغی سەرەتاشدا بە شێوەیەکی دیاریکراو دەتوانن داواکاری بۆ کڕینی دۆلار و تمەن و یۆرۆ و لیرە و یێنی چینی پێشکەش بکەن.

کاریگەریی بانکەکان لەسەر ناوخۆی عێراق؛

هەریەک لەو بانکانەی کە سزادراون بە ریژەیەکی بەرز داواکاریی پێسکەش دەکەن بۆ کڕینەوەی دۆلاری کاش لە بانکی جەی پی مۆرگانی ئەمریکا، ئەوەس وادەکات دۆلارێکی کاشی زیاتر بێتە ناوخۆی عێراقەوە.

لە لایەکی دیکەوە، هەفتەی رابردوو عەلی عەلاق پارێزگاری بانکی ناوەندی رایگەیاند، لەگەڵ وەزارەتی گەنجینەی ئەمریکا سەبارەت بە بانکە سزادراوەکان بۆ کەمکردنەوەی سزاکان لەسەریان بە مەبەستی فراوانکردنی ئاستی بازرگانی ناوخۆی و دەرەکی لە گفتوگۆدان. وتیشی، " دۆلار و هیچ دراوێکی دیکە نادرێتە هیچ بانک و بازرگانێک، ئەگەر نەزاندرێت بۆچیەتی و بۆ ئەومەبەستەش دەبێت لە سیستمی سویفتدا خۆیان تۆماربکەن بە پێچەوانەوە مافی مامەڵەکردنیان بە دۆلار نامێنێت".